Билгтә күүнлә сурһульчнр харһлт кев

Целинн района Сайгачонок нертә бичкдүдин лагерьт инвалид улс дунд һарин урн эрдмин танһчин марһана лауреат Денис Курдюковла сурһульчнр харһлт кев. Көвүд-күүкд энүнә билг-эрдмлә өөрхн таньлдв.

Эн күн дегтр умшхдан дурта, гүн медрлтә болн олн улс дунд тоосмрта күн. Денис Күрдюков негдгч багин инвалид. Зеткртә йовдлд һарһсна хөөн, зург зурдг болв. Олн-зүсн халхар зургуд зурна. Тер тоод йиртмжин бәәдл, фантастик болн дурна туск үүдәврмүдт дурта. Эврәннь зургудан карандашар эс гиж акварельн ширәр зурна. Зургуд зурхларн карандашиг болн киисточкиг шүдндән бәрж зурна. Хамгин дурта ширнь акварель. Иим ширәр ке-сәәхн өнгтә зургуд һарна, йиртмжин цуг сәәхниг үзүлж болна.

Денис Курдюковин келсәр, йиртмж зурхд амр биш. Көдлмшин ик фронт кергтә. Олн-зүсн халхаснь үзүлж болх. Үлгүрнь, нег модыг олн-үзсн таласнь хәләж болх. Зург зурхдан йир дурта. иим кеәвр чееждән бәәсн цхан-санаһан медүлнә. Эврәннь көдлмшән өөрхн улстан, элгн-садндан, нәәжнртән белглв.

Дәкәд болхла мөр зурхдан дуртав, мөрн йир сән цогцта, нег үлү гүүж йовх мөрн дегд сәәхн гиж Денис келнә. Задор нертә зургт мөрд үзүлгджәнә. Эн үүдәвр олн улсин оньг авлв. Тегәд сурһульчнр Денисла харһлт кехәр шиидв. Цевур аһарт һарда элн зургуд зурв. Денис болхла көдвү-күүкдт эврәннь билг-эрдмин тускар келж өгв. Кесг дәкж района болн танһчин һәәхүлмүдт орлцад, призермудт тоод орв.

Энүнә зургуд йир икәр таасгджана гиж эн келв. Бидн һаран иим зургуд зурж чаджахшвидн. Денис болхла шүдәрн зурна. Эннь дегд өвәрц. Мал-аһрус зурсн үүдәврмүд таасгдв гиж эн темдглв. Энүнә үүдәврмүд мадниг икәр байрлулв. Иим кеәвр яһж зургудан зурдгнь соньн болна. Түрүн болж иим зургуд үзжәнәв гиж эн келнә.

Сурһмжлач Ирина Куликован келсәр, иим цаһан седклтә болн жөөлн зангта күүнлә харһад күүндхлә, чееж байрар дүүрнә. Денисин төлә бичкдүдин лагерьт экскурсь бүрдәгдв. Нааран дәкәд нег ирхән көвүн медүлв. Теегин гөрәс зурад, энүг лагерьт белгглх зура бәәнә.

“Сайгачонок” лагерин сурһмжлач Ирина Куликован келсәр, Денис шогч күн, бичкдүдлә дарунь бат хәрлцә бәрв. Энд шин нәәжнрән олж авла. Иим ке-сәәхн зургуд яһж зурдгнь өвәрц болна. Йиртжмин бәәдл, мал-аһрус сәәнәр зурж чадна. Олн-зүсн өнгтә карандашар зурж, дәкәд энүг ширәр кеерүлж.

Ода Денис Москва балһснд одхар белдвр кежәнә. Инвалидмудын сангин хөрн тавн жилин өөнд энүнд үрвр кегдв. Москва юалһснд эврәннь көдлмшән авч йовх саната. Дәкәд болхла хальмгин ке-сәәхн тег зурх санан бәәнә.

Ээнән Делгр, Хулхачин Николай