Бичкдүдин үүдәлтин цутхлнгд шишлнг керг-үүлдвр болв
Сити-чесст бәәх танһчин бичкдүдин үүдәлтин цутхлнгд шишлнг керг-үүлдвр бүрдәж давулгдв. Иим керг-үүлдвр немр эрдм-сурһульд олн бичкдүд оньг тусхалһна төлә күцәгджәнә. Онц темдглхд, ода мана танһчд немр сурһуль арвн хойр минһн көвүн-күүкн дасжана.
Цутхлнгин тууж жирн нәәмдгч жилд эклсмн. Тер жилд уйн наста техникүдин танһчин станц тогтагдв. Энүнд дөрвн кружок көдлжәлә. Эннь авиамодельн, ракетомодельн, судомодельн болн фотокружок. Арвн жил хооран станциг танһчин бичкдүдин үүдәлтин цутхлнгд хүврүлв. Хойр минһн йисдгч жилд цутхлнгин педагогическ коллектив эврәннь үүлдврин һол төр болж танһчин билгтә көвүд-күүкдиг дөннж, эднә билгин делгрүлх төр хаһлжана. Энүнә тускар эврәннь докладтан танһчин цутхлнгин директор Ирина Очирова келв.
Бичкдүдин үүдәлтин танһчин цутхлнгин директор Ирина Очирован келсәр, эн жил эрдм-сурһулин туслжмин то икдүлжәнә. Удл уга спортивн-техническ моделированя әнг секгдх. Иим зөрүлт эрдм-сурһулин улд хамгин түрүнәс авн орулгдсмн.
Ода цутхлнгд художественн-эстетическ, техническ чинртә олн-зүсн марһас болна, урн һарин кегдлүмдин һәәхүлмуд көдлнә. Талдан чигн керг-үүлдврмүд бүрдәгджәнә. Бичкдүдин һарар кесн кегдлмүд тәвгдсн кабинетмуд нааран ирсн улст үзүлв. Сурһульч Настя Хавалова эврәннь көдлмшән олна оньгт тусхав. Энүг күүкн давста һуйрас болн моднас кеж. Лайф танһчин бичкдүдин үүдәлтин цутхлнгин сурһульч Анастасия Хавалован келсәр, эн көдлмш жирлһин блуг гиж нерәдгднә. Эннь моһлцг һазрин өнгтә карт болжана. Энүнд уулас усн һоожна. Уулыг давста һуйрас кеж.
Тер мет немр эрдм-сурһулин улд этношкол көдлжәнә. Энүнә һол күцлнь — келн-улсин литературин, шүлгләнә, келн-улсин эрдмин кегдлмүд келһнә, болн ду-бииһин эрдм делгрүлһнә туст бичкдүдин үүдәлтин билг делгрүлһнә төлә кергтә таал бүрдәлһн болжана. Данзн Басангов жанһрчнрин класст оржана. Эн көвүн олн-зүсн марһаст орлцв.
Дәкәд болхла танһчин цутхлнгд “Радуга” нертә дошкольн белдврин студь үүлджәнә. Энүнә киәчлмүдиг наадлһна эв-арһа давулна. Сар болһн бичкдүд эк-эцктәһән хамдан олн-зүсн марһаст болн талдан чигн керг-үүлдврмүдт орлцна.
Танһчин бичкдүдин үүдәлтин бәәшнгд бахмж кех тоот дала. Энд билгтә көвүд-күүкдт дөн күргжәнә. Эдн иргчдән мана танһчин нер холд туурулх.
Ээнән Делгр, Котина Валерий
