Бичкн боксермудын марһан болжана
Эн өдрмүдт Элст балһснд Церн Балзановин нертә олимпийск көрнгин бичкдүдин спортивн школын боксин марһан болжана. Энүнә дөрвн чиннүртин категорьт зу һар бичкн боксермуд чидлән сөржәнә. Ода мана танһчд боксар соньмсжах бичкдүдин то жил ирвәс өсәд йовна. Эннь бас учрта. Бокс баатр-зөрмг улсин спорт болжана. Бичкн көвүд чанһ-чиирг болна, цогц-махмудан батрулж, йоста залу болж өснә.
Олимпийск көрнгин школын марһанд танһчин болн цугәрәсән дөрлдәнә олн дииләчнр цуглрв. Тер тоод арвн һурвн наста Богдан Шишкин. Эн көвүн боксин секцд зуг нег жилдән оржана. Тер бийнь нег жилин эргцд Богдан хөрн хойр ноолда кеһәд, арвн нәәмн харһлтд диилвр бәрв. Эн марһанд Богдан Шишкин бас диилвр бәрх саната. Өмн үзгин федеральн округин бокин марһана дииләч Богдан Шишкина келсәр, боксин секцд орх селвг авһнь өгч. Секцд ирәд, көлсән асхад көдлхлә сән болна.
Өмн үзгин федеральн округин марһана дәкәд нег дииләч Араш Абушинов харм төрхд эн марһанд орлцжахш. Новочеркасск балһснд болсн ммарһанд орлцжаһад һаран шавтаж. Тер бийнь нааран ирәд, нәәжнрән дөннжәнә. Боксин спорт юуһарн көвүдиг соньмсулна. Энүнә тускар көвүд ухан-тоолврарн хувалцв. ЮФО-н марһана дииләч Араш Абушиновин келсәр, Раджат нертә боксер таасгдв. Энүг дураһад ноолддг дасжана. Билгтә боксерас үлүгр авх саната. “Юность России” марһана дииләч Александр Нимгировин келсәр, бокс баатр-зөрмг улсин спорт болжана. Һаза бийән харсж болх, күн чанһ-чиирг болна.
Иим марһана һол күцлнь — спортын халхар көвүд диилвр бәрсн деерән, эднд төрскнч сурһмж авлһнд сән нилчән күргжәнә. Эн жил бүрдәгдсн олимпийск кшрнгин школын марһан Хальмг танһчин боксин федерацин түрүн президент Виктор Яшкуловин санлд нерәдгдв. Боксин олимпийск көрнгин танһчин школын директор Бембя Мухараевин келсәр, Яшкуловин санлын марһанд баһ наста шинкн спортын хаалһан эклжәх көвүд чидлән сөрж чадх, кергтә дамшлт авч чаджана.
Церн Балзановин нертә боксин олимпийск көрнгин школын директор Бембя Мухараевин келсәр, марһанд школын цуг сурһульчнр орлцжана. райодас көвүд бас ирв, ЮФО-н марһана дииләчнр бәәнә. Тер мет хамгин түрүн болж рингд һарчах көвүд бас бәәнә. Бичкн көвүд йоста залус, иргчдән Виктор Яшкуловла әдл тренермуд болж өсх. Школд ирж көдләд, бичкн боксермудыг белдх.
Марһана товлчлгч девснгнь манһуд апрелин хөрн доланд болх. Дөрлдәнд орлцжах школын хамгин сән гисн жирн боксер дииләчән йилһхмн.
Елена Алексенко, Настан Сергей
