Бичкдүдин садмудын төрәр Дмитрий Медведев селвлцә кев
Хойр минһн арвн зурһадгч жилин январин нег шин күртл бичкдүдин садмудт чеерүд уга болх зөвтә гиж Әрәсән правительствин ахлач Дмитрий Медведев тоолжана. Дошкольн учрежденьс федеральн мөнгәр тосхгдх. Энүнә хөөн региомундын һардачнр зуг эврәннь чидлд болн мөнгнд нәәлх зөвтә гиж премьер-министр субьектмудын толһачнрт заквр кев. Энүнә тускар Дмитрий Медведев дошкольн эрдм-сурһулин региональн систем шинрүлһнә төрәр болсн селкторн селвлцәнд келв. Премьер-министрин темдглсәр, хойр сарин эргцд федеральн мөнг олзлсн цөн регионмуд дунд Хальмг танһчд йовна. Мана танһч йилһж өгсн мөнгнә өрәлинь олзлв. Авсн мөнгәр бичкдүдин садмуд ахр болзгт бәрх даалһвр талдан субьектмудт Медведев өгв. Эндр өдрт Әрәсән эрдм-сурһулин министерствин болн мана региона правительствин хоорнд батлж авсн зөвшәләр Хальмг танһчд зун далн тавн сай арслнг йилһж өггдв. Эрдм-сурһулин министерствин то-дигәр, танһчин бюджетас дөчн дөрвн сай арслнг һарһж өггджәнә. Эн цагин эргцд һурвн зун тәвн немр орм садмудт секгдв, Эн жилин чилгч күртл энүнә то нег минһн тавн зун хөрнд күрх зөтвә. Ода мана танһчд хйор минһн һурвн зун жирн һурвн бичкдүд сад орх чеерүдт зогсжана.
