Баһ наста билгтнрин хуранһу барлгдв

“Во имя Отечества”. Баһ наста шүлгчнрин болн бичәчнрин үүдәврмүдин иим нертә хуранһун түрүн үзүлвр болв. Энүнд балһсна марһана дииләчнрин болн призермудын көдлмш орв. Ут-тоодан шин дегтрин тәвн экземпляр барлгдв.

Баһчудын ик зунь үүдәлтд түрүн ишкдлән кежәнә. Тер тоод арвн хойр наста Елизавета Морозова. Эврәннь түрүн шүлгән аавдан нерәдв. Нәәмн зун арвн хойрдгч жилин дән нертә шүлгиг күсдундур часин эргцд бичв. Дәәнә цагиг гүүнәр шингәж авч. Өвкнрин баатр-зөрмг йовдлыг медж зүркндән орулв. Елизавета Морозован келсәр, шүлг оньдин бчих дурн күрдг билә. Бичәч болх сана зүүв. Өсхләрн нертә шүлгч болад, нерән туурулх күцл тәвж.

Марһана талдан нег орлцач Соня Рябинина у истории нет сослагательного наклонения нертә үүдәвр үзүлв. Жюрин тоолврар, эн көдлмштән күүкн үүдәгч билгән үзүлв, ухан-санаһан тодрха кевәр медүлжәнә. Тер мет Бородинский хлеб нертә туужин үүдәврт бичкн зокьялч туужин гүн медрлән болн уха тунһаж шинжлдгән үзүлв. Соня Рябинина келсәр, түрүн шүлгүдиг болн келврмүдиг өөрхн улснь болн нәәжнрнь умшв. Туужин тускар бичхд күнд болна.

“Во имя Отечества” нертә хуранһуд баһ наста шүлгчнрин болн бичәчнрин үүдәврмүд орв. Әрәсән бичәчнрин ниицәнә хальмгин әнгин ахлач Николай Санджиевин келсәр, харм төрхд хальмг келәр баһчуд бичхш. Мана танһчд дәәнә тускар төрскн келәр бичж чадх сурһульчнр болн оютнр бәәхинь литературн марһан илткв.

“Во имя Отечества” нертә хуранһу олн әмтнд таасгдх зөвтә. Энүг иргч үйнр ик оньган өгч умшх гиж нәәлжәнәвидн. Дәәнә тускар үүдәврмүд бичсн баһ наста билгтнр йоста төрскнч, эврәннь һазртан дурта улс болж өсхнь лавта.

Ээнән Делгр, Настан Сергей