Хаалһс шинрүлж яслһна төлә мана танһчд дөчн сай арслнг ирх
Хальмг танһчин хаалһс ясж шинрүлһнә төлә федеральн бюджетас дөчн сай арслнг йилһж өггдхмн. Эн мөнгәр региональн чинртә хаалһс ясгдх. Тер тоод Городовиковск, Яшалтинск райодт болн Элст балһснд хаалһс шинрүлгдх.
Элст — Арзгир хоорндк региональн хаалһ кесг сардан дегд му дүрстә бәәдл һарв. Ик аца зөөж йовх машид арһ уга хаалһин хажуд кесгтән зогсна. Иим бәәдл энд дару-даруньүзж болх. Нальчик балһсна жолач Артур Хаваяшковин келсәр, Хальмг танһчд тавн өдртән зогсжана. Энүнә машингь хамхрад, сольврин әнгс хулдж авч чаджахш. Артур Хаваяшковин келсәр, хаалһ энд дегд му. Дару-дарунь сольврин әнг хәәж авх кергтә болна. Ода нег төгә арвн хйор минһн арслнг күрчәнә. Энүг олж авч чаджахш. Цаарандан яһж йовхан меджәхш. Нег үлү, ик аца авч йовна.
Эн хаалһин далн дуунаг ик аца зөөсн машид дөрвн частан йовна. Арзгир балһснас авн Ульяновск күртл хаалһ дегд му гиж эн жолач келнә. Эн маши залачин келсәр, Хальмгт хаалһ му. Ставропольск крайд хаалһс сән, йовхд амр. Энүг нег кемд тосхла.
Эннь болхла Элст балһсна уульнцс — Аршанск, Автомобилистов болн Спортивн нертә уульнцсин хаалһ дегд му. Энд нүкн зәрм һазрт гүүндән нег метр күрчәнә. Тер мет иим бәәдл Элстин Чернышевскийн болн талдан чигн уульнцст тогтсн бәәнә. Маршрутн таксин болн эзнә машидын жолачнрин келсәр, иим му хаалһас көлтә маши бәрхд дегд үнтә болжана. Элст балһсна эдл-ахун заллтин ахлачин дарук Хонһр Эльдеевин келсәр, Эн жил Элтс балһсна бюджетд хаалһс яслһна төлә һурвн сай даолан зун дөчн нәәмн арслнг йилһж өггдх. Хамгин түрүнд маршртун автобусмуд йовдг хаалһс шинрүлгдхмн, энүнә хөөн талдан хаалһс ясгдх.
Му хаалһс ясж шинрүлһнә төлә уд луга Хальмг танһчд дөчн сай арслнг ирх зөвтә. Иим көдлдмш күцәх марһан болв, государственн бооцан батлж авгдв. Хаалһс шинрүлж яссн предприятьмуд күцәсн көдлмшин тускар тооца кеж, даавр зүүхмн. Энүнә тускар Госдумд закан хәләгдх. Кемр шинрүлгдсн хаалһ темдглсн болзгт эвдрхлә, тосхачнр эврәннь мөнгәр хаалһ ясх зөвтә.
Арстана Светлана, Очра Сергей
