Арвн хойрдгч школын сурһульчнр хальмг келәр күүндх дуудвр кев
“Полет мыслей”. Иим нерәдлһтә керг-үүлдвр Элстин арвн хойрдгч школын сурһульчнр бүрдәв. Хотл балһсна цутхлнгд эдн хальмг келәр күүндх дуудвр кецхәв. Тер мет бичкдүд хальмг би бииләд, ду дуулв. Иим керг-үүлдвр Цель знаний нертә социальн төсвин балһсна марһан программар бүрдәж давулгдв.
“Дөрвдә Товшур”, “Шарка-барка”, “Чичрдг”. Элст балһсна тал дунд школын коллектив йоста концерт үзүлв. Элстихн таньдг көгжм сончкад, зогсад, бичкн артистнрин би хәләв. Зәрмснь болхла дор ормдан зогсж чадлго, эдниг дахад биилв.
Хам-хоша бәәх плошадкт болхла көвүд шаһа наадв. Энд бас олн улс цуглрад, соньн наад хәләв. Зурһадгч классин сурһульчнр Арлтан Мухараев болн Владимир Егоров хальмг улсин хуучн наадна тускар тодрхаһар келж өгчәнә. Ода иим наадыг олн көвдү-күүкд дурлж наадна. Хөөнә мах икәр иддг улст шаһа чигн дала болна гиж әмтн шоглна. Ода шаһа цуглулжана. Һурвн шаһата, дәкәд болхла хөрн зурһан шаһа кергтә. Нәәжнр шаһа нааджасинь үзж. Таасгдв. Тегәд иим соньн наад школд дасж авла. Иим наадан һол күцлнь — талдан күүнд нүүдл өгшгоһар наадх кергтә.
Тер саамд күүд болхла нәрн шинж наад дасж авхар зүткжәнә. Эннь амр наадн биш. Энүнд һарин эв кергтә, ухалх бас кергтә болна, тер мет ик теслт керглгднә. Алина Хокшанован келсәр, сүл цагт школд хамдан сурчасн көвүд-күүкд нәрн шинжәр икәр соньмсжана. Зурһадгч классин сурһульч Алина Хокшанован келсәр, иим наад ухан-медрлд туслна. Тегәд нәрн шинж наадх дурн күрв.
Иим керг-үүлдвр “Цель знаний” нертә социальн төсвин балһсна марһана программар бүрдәж давулгдв. Энүг давулхин төлә Элст балһсна цутхлнг шүүж авснь бас учрта. Элстин арвн хойрдгч школын хальмг келнә багш Евдокия Егорован келсәр, эн керг-үүлдврт олн улс орлцулхин төлә балһсна хамгин олан әмтн цуглрдг һазр шүүж авгдв.
Танһчин әмтн хальмг келәр күүндәд, өвкнриннь уул авьяс-зангшал хадһлх дуудвр керг-үүлдврин бүрдәһәчнр кев. Эдн әмтнд бчикн дегтрмүд белглв. Энүнд шинкн хальмг кел дасжах улст дөнцл материал бәәнә. Элст балһсна улсин келсәр, эдн олн-зүсн наадар, ду-бииһәр дамжулж төрскн келән дасжана. Иим эрдәмн эдн олн улст үзүлв.
Ээнән Ольга, Очра Сергей
