Иргч нарн өдр сунһвр болсн цагт мана танһчин сунһачнр дууһан өглһнә шин техник олзлх
Ода эн болн талдан чигн зәнгсин тускар тодрхаһар. КАИБ нертә комплекс Хальмг танһчд көдлх. Иргч нарн өдр сунһвр болсн цагт мана танһчин сунһачнр дууһан өглһнә шин техник яһж көдлдгинь үзх. Өдгә цагин некврлә ирлцәтә дууһан өглһнә комплекс арвн дөрвн участкт углж тәвгдх. Сунһлһна бюллетень тоолж һарһдг арвн һурвн автоматическ комплекс райодт йовулгдв, нег иим комплекс Элст балһснд дөчн зурһадгч тойгта участкт көдлх. Хальмгин сунһлһна комиссин эндр зәнглсәр, комиссьмүдин гешүд болн участкин ахлачнр иим оборудованяр көдлхин төлә шишлнг цутхлнгд сурһуль дасад, ирлцнһү сертификат авв.
Сүл цагт олн үртә өрк-бүлмүдт шангин халхас кергтә дөн күргджәнә. Ик кезәнәс авн хальмг улс олн үртә болдг авьяста билә. Болв сүл цагт баһчуд дала үр һарһхар седхш. Ода Әрәсән правительств олн үртә өрк-бүлмүдт онц оньг тусхаж, иим улст ик урмд өгчәнә. Тиим нег өрк-бүлин тускар мана зәнгч Аджин Светлана келжәнә.
