«Инглтин» паркт нохасин һәәхүл болв

Элст балһснд «Инглтин» паркт түрүн болж нохасин һәәхүл болв. Эн керг-үүлдвр бүрдәсн улсин зәнглсәр, эн нәр йир соньн болв. Күн болһн энүнд өвәрц костюмта болн самларта нохасиг үзж чадв.

Нохас бәрсн улс хамгин түрүнд эврәннь нохасла сән үүрмүд болх зөвтә. Ухата нохас бичкдиг хәләж, малмудыг хәрүлж, нүднә харань тату улст дөнгән күргч чадна. Эн керг үүлдврт жирн ноха орлцв. Эн керг үүлдвр жил болһн давулгдх гиж маараһана бүрдәһәчнр келж өгв.

Елена Посвежимован келсәр хамгин үтүрнд эн марһанд бидн Элст балсһнд кедү сән тохмта нохасс бәәхинь медхәр седв. Эндр өдр олн зүсн нохас үзәд бидн байрта бәәнәвидн. Ноха бәрсн улс эднлә ик көдлмш давулна. Ноха урдк кевәр харсач болжана.

«Иньглин» паркин бәәрн бичкн болв чигн энүнд нохас дассн медрлән үзүлв. Нохасиг хәләсн улст эн керг үүлдвр таасгдв. Ирсн улс энүнд ик болн хамгин бичкн нохасиг үзж чадв.

Диилвр бәрхд нәәмн даалһвр нохас күцәх зөвтә бәәсмн. Елена Петрован келсәр эднә нохас йир жөөлн зангта, бичкдүдт эвр дурта эдниг дангин харсна. Ик ноха бәрхд невчкн күнд болна тиим болв чигн ик тусан күргнә.

Ноха бәрх эс бәрх күн болһн эврән ухалх зөвтә. Ачта амрллһна һарсна хөөн күч көлснә ветеран Бормангна Дина бийдән ноха бас авсн билә. Эврән ноха жилтә болад нохаст бичкн цагасн авн дурта. Ирх жилд эн марһанд орлцх зөвән өгләв гиж медәт маднд келж өгв. Эн һәәхүл йир соньн болв. Эн һәәхүлд шишлн цаасн уга ноха орлцж марһлдж чадна.

Нохасин һәәхүлд орлцсн улс хоорндан таньлдаад күүндән дамшлтарн хувалцна. Ямаран болв чигн ноха бәрсн әмтн ирх жилд тиим марһанд орлцх арһ бәәнә.

Хавтхна Элла, Очра Сергей