Хөрн тавн жилин туршарт Хальмгин нертә артистк Зоя Хонхолджинова кесг соньн дүрмүд наадад, эврәннь хәләһәчнрән байрлулв
Ода сойлын туск зәнг. Хөрн тавн жилин туршарт Хальмгин нертә артистк Зоя Хонхолджинова кесг соньн дүрмүд наадад, эврәннь хәләһәчнрән байрлулв. Наадһасин театрт тәвсн наадд бичкдүдт икәр таасгдна. Энүнлә хамдан көдлжәх әмтн энүнд бүлән үгмүдән нерәднә.
Артистк Зоя Хонхолджиноваг Хальмг танһчин ик нертә сойлын үүлдәч гиж келж болх. Наадһасин театрин эрдмч, драмин актрис, режиссер эврәннь билгәрн олн улсиг кесг жилдән байрлулж йовна. Хөрн тавн жилдән театрт көдлжәнә. Эврәннь һол көдлмш кесн деерән, Зоя Хонхолджинова Элст балһсна школмудт театральн студьт көдләд. бичкдүдт артистин эрдм дасхжана. Энүнә тәвсн наадд танһчин марһаст жил болһн өөдәнәр үнлгднә.
Зоя Хонхолджинова олн үртә өрк-бүлд төрв. Энүнә эгчин тодлсар, бичкн цагтан Зоя өөрхн улстан олн-зүсн наад үзүлдг бәәсмн. Эк-эцкнь, элгн-саднь түрүн хәләһәчнрнь болв. Тер мет школд сурчаһад, нааднд орлцдг билә. Тегәд чигн школан төгсәснә хөөн, Элст балһсна көгжмин училишин медлд үүлджәсн театральн студин оютн болж сурв. Энүнә хөөн Ярославск театральн институтд орв.
Ода Зоя Хонхолджинован үүдәлтин хаалһд шин девснг эклв. Өдгә цагт билгтә артистк Баснга Баатрин нертә Хальмгин келн-улсин театрт көдлжәнә. Урднь энд Зоя Хонхолджинова үүдәгч түрүн ишкдлән кесмн. Танһчин уйн наста хәләһәчнрин театрт көдлсн цаг энүнә санлд хамгин әсн кем гиж мөнкинд үлдх. Драмин артистск болж көдлсн жилмүдт актрис кесг өөдән ачлврар ачлгдсмн. Тер тоод бичкдүдин театрмудын нарта-делкән фестивальд күүкд улсин дүр хамгин сәәнәр наадсн төләд мөрә авсмн билә. СНХ Юрий Давыдовин келсәр, Зоя билгтә артистк болсн деерән, бүрдәмжин көдлмш сәәнәр күцәнә. Энүнә наадсн дүрмүдиг хәләхд йир соньн болна.
Бичкн цагасн авн өмнән ик күцл тәвәд, Зоя Хонхолджинова ода тоомсрта артистк болв. Зоя Нюкеевна тоолврар, теслттәһәр көдләд, дурат эрдмән седклән өгәд күцәхлә, күн болһн иим сән күцәмж бәрж чадх. иргчдән мана танһчин нертә артистк эврәннь хәләһәчнрән соньн дүрмүдәр байрлулх саната.
