Хуучн гермүдт бәәх улс удл уга шин бүүрт орх

Хуучн нурад унжах гермдүин эздүд шин бүүрт нүүж орхан тенкән уга гидгәр күләжәнә. Тер тоод Элст балһсна Правда переулкин дөрвдгч хойр давхрта гермүдин эздүд шин патьр күләжәнә. Эднә бәәсн гер доргашна сууһад, герин эрсн болхла шуурад, ик әәмшг учражана. Эн хурц төрин тускар мана түрүн сюжетд келгджәнә.

Энүнә патьрт эрсин шуурхаһар хам-хоша бәәх улсла һаран өгәд мендлж болх гиж Надежда Убушаева келнә. Герт бәәсн шкаф хувц-хунрас сулдхх кергтә болв. Генткн эрсн нурад ик әәмшг учрах гиж әәжәнә. Ода күүкд күн әәһәд талдан герт орх саната. Эднә гер олн давхрта хуучн гермүдин тоод орсна хөөн шин бүүрт орхиг тенкән уга гидгәр күләжәнәвидн гиж күүкд күн келв.

Элст балһсна бәәрн күүкд күн Надежда Убушаеван келсәр, хам-хоша бәәх улс йовснь энд сонсгдна. Кемр бичкдүд һәрәдәд наадхла люстр унх әәмшгтә болна. Зәрмдән хам-хоша бәәх улст одад, бичгә шуугтн гижсурна. Иим таалд бәәхд күнд. Иим патьрмудт бәәж болжахш.

Тер мет иим бәәдл талдан чигн патьрмудт тогтв. Сөөднь унтхла, гер шуурад, нурад унх әәмшгтә ә һарна гиж патьрмудын эздүд келнә. Тер бийнь эврәннь арһ-чидләрн патьран цаһалһад, ширднә. Иим ясвр кехин төлә жил болһн арвн тавн —хөрн минһн арслнг мөнгн һарна.Полуляшихна өрк-бүл эн герт хөрн жил хооран нүүж орла. Сүл жилмүдт ясвр кеһәд муурда бәәв гиж эдн келнә. Шин у-сарул патьрт орхан ик гидгәр күләжәнә. лайф правда нертә переулкин бәәрн күн Сергей Полуляшина келсәр, жил болһн обои, цемент, плитк хулдж авна. Шин линолеум делгв. Эс гиж үвлднь киитн болг билә. Иим бәәдлд бәәж болжахш. Гер шуурад нурх әәмшгтә.

Андрей Олюшкиевин келсәр, герт чиг хурад, эрсин шир хуурад унжана. Эднә гериг хуучн нурад унжах гер гиж тоолснас авн бәәрн әмтн патьрмудт бәәхдән әәжәнә. Ода гериг төмр бүсәр бүсләд батрулв. Эднә герт капитальн ясвр кесинь әмтн тодлхш. СНХ Правда переулкин бәәрн күн Андрей Олюшкиевин келсәр, дорд үзгәс астраханск салькн көдлхлә, патьр дотр салькн ивтрнә. Дулан торхш, үвлднь йир киитн болна.

Правда переулкин дөрвдгч герт бәәх нәәмн өрк-бүл болн талдан уульнцин бәәрн улс зурһадгч микрорайонд тосхгджах дөчн патьрта герт нүүж орх зөвтә. Элст балһсна мэрийн зәнглсәр, шин гериг федеарльн, бәәрн бюджетмудын мөнгәр болн внебюджетн мөнгәр тосхжана. Әмтиг хуучн гермүдәс нүүлһнә программар жирн нәәмн сай арслнг йилһж өггдсмн. Шин гер эн жилин октябрин ичлгчәр эс гиж ноябрин эклцәр эдлврт орулгдх зөвтә. Ода энд һурвдгч давхринь бәржәнә. Энүнә хөөн герин дотркиг шалдж ширдх кергтә.

Элст балһснд шишлнг комиссь әмтн бәәхд әәмшгтә гиж арвн йисн гер темдглв. Зурһан зун күн шин бүүрт нүүж орхан күләжәнә. Эднд иргч жилд шин патьр өгх зура бәәнә. Әмтиг хуучн гермүдәс нүүлһнә федеральн программар мана танһчд хөрн негн дөрвлж метр хуучн гермүд хамхлгдхмн.