Хуралын ахлач болн сенатор Октябрьск районд одв
Хальмг танһчин олн-әмтнә хуралын ахлач Анатолий Козачко болн Хальмг танһчас сенатор Алексей Майоров Октябрьск районд одад, селәнә эдл-ахун көдлмшин эн жилин ашар соньмсв, района улсин бәәдл-жирһллә өөрхн таньлдв. Келхд, Алексей Майоров эн районд түрүн болж одв.
Районд одсн олн-әмтнә хуралын ахлач болн Хальмг танһчас сенатор эн өдр бичкдүдин садмудт орм дутжахин тускар, Ик Царнг селәнд физкультурн спортын комплекс тосхлһна тускар бәәрн улсла болн района һардачнрла тодрха күүндвр кецхәв. Хальмг танючас Әрәсән Федерацин хүүвин сенатор Алексей Майоровин келсәр, бичкдүдин садмудт орм кергтәнь хурц төр, болв бәәрн әмтн үрән һарһад, энд бәәжәнә. Эннь сән керг. Ода дав зуур школд бичкдүдин төлә орм йилһж өгх кергтә. Дәкәд нег шин сад бәрх кергтә.
Мөнгәр цаглань теткхлә района цутхлнг селәнд болн Ик Царнгин өөр бәәх поселкд иргч жилин намрар усн ирх зөвтә. Эн обьект кесг жилдән тосхгджана. Генеральн сметар ик чинртә тосхлт күцәхин төлә дәкәд жир сай арслнг кергтә болжана. Талдан ик чинр зүүжәх обьект болхла — эннь олн жилдән бәргджәх района больницин гер болжана. Эн төр октябрьцнрт хурц төрт хүврв. Энд дөчн әмтн бийән эмнүлх әнг болн хойр операционн блок көдлх зөвтә. Энүнд өдгә цагин некврлә ирлцәтә оборудовань углж тәвгдх.
Района администрацин ахлач Санл Адьяевин келсәр, дөрвн жил хооран тосхлт эклснә хөөн, проенктд орулгдсн тосхлтын материалмудын үн кесг холванд өсв. Тегәд чигн тосхлтын смет бас кесг холванд өсв. Өдгә цагт обьект эдвлрт орулхин төлә цуг кергтә көдлмш кегджәнә. Энүг эрк биш төгсәх күцл тәвгджәнә. Юнгад гихлә, эннь социальн ик чинр зүүжәнә. Октябрин тәвн жилин нертә эдл-ахун көдләчнрлә болн күүндврин йовудт тутрһ урһаж авдг халхин иргчин тускар келгдв. Хальмгин олн-әмтнә хуралын ахлач Анатолий Козачкон келсәр, района әмтн урһаж авсн тутрһиг талын һазрт хулдх зокал кергтә. Энүнәс эдл-ахус ору авхла сән болх.
Тутрһчнрин көдлмш гиигрүлдг шин техникин тускар бас тодрхаһар келгдсмн. Октябрьск района администрацин ахлач Санл Адьяевин келсәр, удл уга селәнә эдл-ахун халхар государственн программ батлж авгдх. Энүг Орловин даалһврар декабрь сар күртл белдх зөвтә. Энүнд Октябрьск района халһх төрмүд бас орх гиж нәәлжәнә.
Хальмг танһчин ар зүгт бәәх Октябрьск района улст тутрһин сән урһц хураж авлһн экономикин халхар ик чинр зүүсн деерән, социальн туст бас ик чинртә төр болжана. Эн халхар кех-күцәх көдлмш дала гиж харһлтын йовудт темдглгдв.
Хавтхна Элла, Очра Сергей
