Хотл балһснд соньн һәәхүл көдлжәнә
Хамгин бичкн элстихн эн өдрмүдт өвәрц мал-аһруснла өөрхн таньлдж чадхмн. Элст балһснд соньн зүстә тоть шовудын болн сар мөчнә һәәхүл көдлжәнә. Эдниг моһлцг һазр болһнас авч ирсмн.
Эн өдрмүдт бичкн плошдкт цөн дөрвлжн метр аһуд хөрн зүсн тоть шовун болн күсдундур зүсн сар мөчн хоорндан ни-негн бәәршлжәнә. Йиртмжин таалд болхла эдн хамдан бәәхш. Нег үлү иим өөрхнд бәәһәд, иим ни-негн кевәр бәәж чадшго бәәсмн. Юнгад гихлә эдн олн-зүсн континетмудт бәәршлнә. Яванский макак Анфиса болн цаһан һарта гиббон Соня һәәхүлд бәәх мал-аһруснас хамгин ик болж һарчана. Һәәхүлин бүрдәһәчнр нааран ирсн улст йоста йиртмжлә өөрхн таньлдх арһ учрав.
Һәәхүл хәләхәр ирсн әмтн эрк биш моһлцг һазр деер бәәх хамгин бичкн сар мөч карликин игрунка нертә сар мөч хәләхәр седнә. Эдн арвн — арвн хйор жилдән бәәнә. Далн-йирн грамм татна. Иим сар мөчнә хамгин икнь зун хөрн грамм чиннүртә. Иим бичкн болснас көлтә эдниг талдан ан-аһрусн гиж тоолна.
Һәәхүлин экскурсовод Елена Аракелян келсәр, зәрм әмтн иим бичкн сар мөчиг үкр хулһн гиж келнә. Бидн хамгин бичкн сар мөч үзүлх санатавидн. Эднә зәрмнь ода йиртмжд тас уга болж одв.
Һәәхүлд игрунка бичкн сар мөчн, мармозетка, удан болн бөдүн Лори, мартышк, тамарин, һурвлһ, шар шовун, шаазһа болн олн-зүсн тоть шовун. Эдн олн-үзсн өнгтә болна, бор, цаһан, оошг, амазонский, венесуэльский нертә тоть шовуд әмтнә оньг авлжана. Эдн хоорндан бәәдләрн болн йиртмжд бәәлһнә тааларн йилһрнә. Һәәхүлд ирсн улсиг сар мөчн тәвлго соньмсж хәләнә. Болв хамгин бичкн улсла эдн ахр болзгт таарад, ижлднә. Болв зәрм шовун күүнәс үргнә.
Үлгүрнь, эн тоть шовун күүнә һарт эс гиж толһа деер суухдан дурлхш. Целинн районас ирсн баһ тетквртә болн олн үртә өрк-бүлмүдин бичкдүдлә эн тоть шовун ижлдәд әәсн уга. Шар өнгтә тоть шовун таасгдв гиж күүкн келнә. Эн күүкнд болхла сар мөчн таасгджана. Блиц З — эн көвүнә келсәр, нег сар мөчн һар деернь гүүж. Энүнә көлнь йир жөөлн.
Өвәрц һәәхүл хәләхәр ирсн цуг улст ик — баһ угад шовуд болн сар мөчн йир икәр таасгдна. Эннь һәәхүлин нуувч болжана.
Хавтхна Элла, Хулхачин Николай
