Боксин марһанд арвн долан региона элчнр ирж дөрлджәнә
Элст балһснд болжах боксин марһанд арвн долан регионас зун хөрн спортсмен ирж дөрлджәнә. Энүнд арвн тавн-арвн зурһан наста көвүд дииләчән йилһжәнә. Энүг “Юность России” нертә физкультурн-спортын негдлт болн боксин федерац бүрдәж давулжана.
Дөрлдән бичкдүдин үүдәлтин бәәшнгд болжана. Марһана дииләчнр эн жилин май сард Воронеж балһснд болх Әрәсән марһанд орлцх зөв авхмн.
Боксин дөрлдәнд арвн долан регионас зун хөрн көвүд ирж дөрлджәнә. Эннь сүл цагт болсн марһанас хамгин олн спортсмен орлцжах дөрлдән болжана. Энүнә тускар бүрдәһәчнр келнә. Юность России нертә олна государственн физкультурн-спортын негдлт болн боксин федерац Элст балһснд болжах марһана ашар дииләчнрәс команд тогтах саната. Шинәс тогтагдсн команд нег сар болад Воронеж балһснд болх Әрәсән марһанд орлцх.
Әрәсән ачта тренер Валерий Смоляковин келсәр, марһана ашар ямаран шүүвр кехнь ик чинр зүүжәнә. Тегәд шүүвр чанһ неквртә болх. Зуг дииләчнриг шүүж авх зура бәәнә. Хальмгин көвүд сән белдвр кеснь үзгдв. Тегәд “Юность России” команд сән болх зөвтә. Цаарандан Әрәсән марһанд сән күцәмж бәрх гиж нәәлжәнәвидн.
Элст балһснд иим ик чинртә боксин марһан болжахнь бас учрта. Негдвәр, мана танһчд Әрәсәд нер туурсн тренер Церн Балзановин тогтасн бат ул болн сән зангшал. Ода Элст балһснд көдлжәх олимпийск көрнгин школд бичкн көвүд олар ирж боксин эрдм дасжана.
Школд хамгин әсн методик олзлгджана, хамгин сән тренермуд көдлжәнә. Уйн наста боксермуд нертх боксермудас үлгүр авчана. Жил ирвәс сән үзмж бәрсн спортсменмүдин то өсәд йовна.
Хальмг танһчин боксин федерацин президент Церн Бельтриковин келсәр, Европин марһана дииләч Богдан Болдырев бәәнә. Казань балһснд болх нарта-делкән Универсиадт Чингис натыров орлцх зөвтә.
Марһан тавн өдртән болх. Товчлгч дөрлдән мартын һучнд төгсх. Эндр болн өцклдүр болсн ноолданд далн көвүн чидлән сөрв. Хальмгин боксермуд энүнә ашар сән күцәмж бәрв. Хойр спортсмен диилвр бәрв. Марһанд зуг түрүн орм эзлх саната. Хальмг танһчин боксер Артем Новиковин келсәр, эндр хамгин сән ноолдаһан кев. Аштнь диилвр бәрв. Дагестана боксерла ноолдад шүүв. Манһдур дәкәд ноолдх кергтә.
Элст балһснд ирсн команд болһна ханьд әрәсән марһана дииләчнр бәәнә. Хальмгин командын ханьд Өмн үзгин федеральн округин марһана дииләч Араш Абушинов, Волгоградск областин командын тоод Европин марһана призер Альберт Радионов. Тегәд Элстин марһан йир зүткәтә болхнь лавта. Волгоград балһсна элч Антон Алонченкон келсәр, эднә командын ханьд сән боксер Альберт Родионов бәәнә. Эндр Альберт шүүһәд, командыг өөдән девснгд күргв.
Марһан байрин бәәдлд секлһнд Хальмг танһчин толһач Алексей Орловин уйн наста боксермудт илгәсн йөрәл умшгдв. Энүг танһчин спортын, баһчудын болн туризмин министрин дарук Константин Манджиев умшж өгв. лайф бичкн цагасн авн боксар соньмсхла, эвтә-довта чанһ-чиирг болна. Спортын клубмудт боксин секц секгджәнә. Тренермуд белдгджәнә. Иим марһа бүрдәж давулһн ик чинр зүүнә. Дорас өсж баһчудт чик сурһмж өглһнд иим дөрлдән сән нилчән күргнә.
Ода деерән марһана ашин тускар келхд эрт болжана. Полуфинальн ноолдан мартын хөрн нәәмнд — хөрн йиснд болх.
Чучян Валентина, Хулхачин Николай
