Хальмгин усна обьектмуд цеврлгджәнә

Хальмг танһчин усна обьектмуд хог-богас цеврлж шинрүлгдх. Ода Ик-Буурла района аһуд Хар Һазра магистральн цувг яслһна көдлмш кегджәнә. Далн дууна участк цеврлһнә көдлмш эн жилин чилгч күртл төгсх. Иим көдлмш федеральн шишлнг программар күцәгджәнә. Энүнә төлә зун сай арслнг йилһж өггдв. Тер мет Яшкульск районд хойр усна обьектд бас ясврин көдлш кегджәнә.

Ода цувгиг цеврлхин төлә экскаватормуд, бульдозермуд болн талдан чигн техник плошадк белджәнә. Специалистнрин келсәр, иим белдврин көдлмш кехд дала цаг кергтә. Ясвр кех участк утдан далн дууна. Услврин кем болжахас иштә ус завср угаһар урдк кевәр өгчәнә. Эн цувгас танюһчин тавн арйонд усар теткгднә. Тегәд чигн цувгиг намра экләд цеврлхмн.

Калмеливодхозын Ик-Буурла филиалын директор Юрий Владимировин келсәр, цувг шинрүлж яслһна көдлмшин йовудт цувгин йорал хог-богас цеврлгдх, сооруженьс ясгдх. Эн цувгар нег секундт һучн тавн кубическ метр усн гүүх зөвтә. Ода болхла зуг арвн хойр кубическ метр усн гүүжәнә.

Иим саглулгч көдлмш күцәснә хөөн, цувгд усн сәәнәр гүүх, һазр услж болх. Хар Һазра магистральн цувг дөчн жил хооран эдвлрт орулгдсмн. Тер цагас авн энүнд ясвр кегдәд уга бәәж. Эн цагин эргцд усна өнгнь сольгдв, усн деер тоста пленк тогтв, ик хог-бог цуглрв. Энүнәс көлтә усн мууһар гүүдг болв.

Калммелиоводхозын директорин дарук Очр Дертеевин келсәр, ут-тоодан цувг утдан зун дөчн дууна. Энүнд усн Чоһран боодгас иржәнә. Энүнә усар нег сай хойр зун минһн гектар һазр услж болх. Тавн райо усар теткжәнә. Услврин аһу һучн тавн минһн гектар тогтажана. Энүнәс арвн хойр минһн гектар царнг эзлжәнә.

Хар Һазра услврин системин шинрүлһнә көдлмш федеральн шишлнг программар кегджәнә. Ик Буурла района һауд бәәх далн дууна участк ясхин төлә зун сай арслнг йилһж өггдв. Тер мет эн көдлмшлә зерг Яшкульск районд хойр усна обьектд бас иим ясвр күцәгджәнә.

Калммелиоводхозын директорин дарук Очр Дертеевин келсәр, эн жил Хар Һазра магистральн цувг яслһна көдлмшлә зерг Улан-Эргин боодг болн Һашунск цувг ясгджана. Эннь Яшкульск районд. Цуг обьектмуд болзгаснь урд ясгдх. Боодгт усн цуглулгдна. Хөөннь энүг услврт олзлна. Дәкәд болхла эн усар мал услгдна, талдан чигн селәнә эдл-ахун кергт олзлгдна.

Көдлмшин даалһвриг танһчин һазрин мелиорацин болн селәнә эдл-ахун халхар усар тетклһнә региональн заллт күцәжәнә. Жил болһн эн учрежеднь зун тәвн-зун жирн сай арслнг федеральн мөнг олзлжана. Үлгүрнь, давсн жилд Сарпинск услврин систем цеврлж ясгдв.

Эн цувгас усн Октябрьск района тутрһин чекмудт болн Приозрен цувгд өггджәнә. Хойр минһн арвн тавдчг жилд Яшкульск района аһуд Хар Һазра магистральн цувг шинрүлж ясгдх. Утдан эн участк далн дууна тогтажана.

Ээнән Ольга, Очра Сергей