Үстин района урн һарта күүкд улс марһана лауреатын нер зүүв

Әәдрхн балһснд Город мастеров нертә урн һарин эрдмин медрегиональн фестиваль болв. Энүг “Дельта Волги без границ” нертә нарта-делкән этносоциальн программар бүрдәж давулв. Фестивальд Дагестана, Волгоградын, Краснодарын болн талдан чигн балһсдын урчнр ирж орлцв. Тер тоод Үстин района урн һарта күүкд улс фестивальд билг-эрдмән үзүлв.

Наталья Леджанова болн Валентина Басангова урн һарта улсин марһанд орлцв. Дөрлдәнә зокалар көдлмш кехин төлә тавн час өггдв. Эн цагин эргцд Наталья Леджанова түнгрцг уяд алтн утцар зег хатхж чадв. Талдан хальмгин эрдмч наадһа кев. Энүнә кесн үүдәвриг жюри өөдәнәр үнлв. Аштнь марһана лауреатын нер зүүв.

Дурта эрдәмрн Наталья Леджанова дөчн жилдән көдлжәнә. Цаһан Амна гимназьд технологин багш болж көдлжәһәд, бичкн цагтан дасж авсн эрдмән сурһульчнриг дасхжана. Энүнә сурһульчнрин көдлмш кесг дәкж олн-зүсн марһаст түрүн орм эзлсн билә. Эн көдлмш мана өвкнрин зөөриг хадһлад байжахмн нерәдлһтә танһчин марһанд келн-улсин зангшалар уйлһна номинацд түрүн орм эзлв. Алтн утцар хатхмр кедн эрдм күнд болн жанһрта. Энүг зег хәләхлә ил медгднә. Иим көдлмш кехин төлә ик теслт кергтә. Ода эрдмч ут-тоодан хойр зун көдлмш кеж һарһв. Тер тоод олн-зүсн кеерүл, ишкә наадһас, костюм, хәәрцг болн талдан чигн көдлмш бәәнә. Энүг өөрхн улстан белглж болх эс гиж кеерүл гиж өмсж болх. Ода Наталья Зунква гегәнә хург хатхжана.

Иим әрүн зург хатх белдхин төлә хурлд одад, зөвшәл авсмн. Тер мет урн һарта эрдмч Цаһан болн Ноһан Дәркин зургуд хатхв. Эдниг олн-зүсн һәәхүлмүдт үзүлнә. Иим нәрн болн әрүн көдлмшиг урмдтаһар болн оюни седклтәһәр кех кергтә гиж Наталья келнә.

Ода урн һарта эрдмчнр «Вместе мы — Россия» нерәдлһтә келн-улсин үүдәвлтин цугәрәсән фестивальд белдвр кежәнә. Энүнд хальмгин элчнр мана өвкнрин уул авьяс зангшалла олн улсиг өөрхн таньлдулх.

Ээнән Делгр, Бадмаран Владислав