Хальмгин университетд зунын кемд оютнр багшин дамшлт авсна аш диглв

Хальмгин университетд зунын кемд производственн дамшлт келһнә аш диглгдв. Энүнд нерәдгдсн конференцд школмудын директормуд болн багшнр ирв. Баһ наста багшнриг белдлһнә төрәр университетла нөкцлт күцәсн көдләчнрин зәрмнь Хальмгин деед сурһулин күндлһнә һашгудар болн мөнгнә мөрәһәр ачлгдв.

Элст балһсна олн халхта гимназь талдан сурһулин учрежденьсла хамдан Хальмгин университетла өөрхн залһлда бәрж үүлджәнә. Ода гимназьд танһчин деед сурһуль төгсәсн арвн һуврн багш көдлжәнә. Эднәс тавн күн хальмг келнә багшар көдлхәр шиидв. Сурһуль сурчаһад эдн гимназьд ирәд, дамшлт хоршасмн. Гимназин келн-улсин сурһулин директорин дарук Зоя Чокаеван келсәр, багшр оютнриг эрдмәрн сәәнәр көдлхинь дасхсн деерән, бичкдүдт дуран өгч көдлх сурһмж өгх зөвтә. Тер мет шин эв-арһ олзлж көдлх дамшлт өгх кергтә. Гимназин директорин дарук Зоя Чокаеван келсәр, өдгә цагин багшнр сурһулин шин эв-арһла таньлдх зөвтә, зәнглһнә эв-арһ сәәнәр медх зөвтә.

Гимназин һардачнр баһ наста багшнрт урмд өгхин төләд эдниг мөрәлнә. Талдан чигн таал бүрдәнә. Хальмгин университетин баһ наста специалистнриг көдлмшәр тетклһнә цутхлнгин директор Оксана Кониеван келсәр, давсн жилд нег минһн оют школмудт дамшлтан өөдлүлв. Тер тоод селәнә школмудт зун күн одад көдлв. Деед сурһуль төгсән баһчуд школд көдлхин төлә бидн ирлцнһү көдлмш күцәжәнәвидн.

Зунын кемд оютнр көдлсн аш диглснә хөөн, ректор Бадм Салаев баһ наста специалистнриг белдлһнд нөкд болсн багшнрт болн школмудын директормудт ханлтын бичг болн мөнгнә мөрә бәрүлж өгв. Тер мет хамгин сән оютнриг бас ачлв. Ода танһчин школмудт баһ наста башнрин то зуг долан процент тогтажана. Эннь баһ кемжән гиж эрдм-сурһулин министерствин көдләчнр тоолжана.

Татьяна Зубцова, Жамбин Дмитрий