Хальмгин университет марһана дииләч болв
Хальмгин университет Әрәсән арвн дөрвн деед сурһулин тоод Кадры для регионов нертә секәтә марһана дииләчин тоод орв. Иим марһан Әрәсән Президентин даалһврар бүрдәж давулгдв. Хальмгин государственн университетин болн танһчин нүүрлдгч предприять-организацсин хоорндк нөкцлтин программ сән үзмжтәһәр күцәгджәнә.
Өөдән мергжлттә специалистнр белдлһнә төр хаһлхин төлә Кадры для региона нертә федеральн программ үүлджәнә. Эн программар Хальмгин государственн университет мөнгнә мөрә шүүж авв. Эн мөнгәр өдгә цагин некврлә ирлцәтә эв-арһ олзлж сурһулин производстенн ул бүрдәх арһ учрв. Энүнәс иштә танһчин производственн предприятьмудла өөрхн залһлда бәрж көдлх арһ учрв. Эн төсв күцәжәх орлцачнр давсн жилин көдлмшин аш диглв.
Хальмгин университетин ректор Бадм Салаевин келсәр, иим программ хойр минһн арвн һурвдгч — хойр минһн арвн дөрвдгч жилмүдт һарснь бас учрта. Арвн дөрвн деед сурһулин улд энүг шинжлж хәләв. Эн жилин чилгчәр регионмудт дунд шишлнг марһан болх.
Эрдм-сурһулин предметмүдиг производствин некврлә ирлцүлхин төлә инннвационн эв-арһ кергтә болх. Шүүж авсн мөнгәр шин оборудовань хулдж авгдв. Энүнәс иштә танһчин предприятьмудла хамцу керг-үүлдврмүд күцәж болх. Аграрн факультетин лабораторин шин оборудованяр селәнә эдл-ахун предприятьмудын төлә зәрм шинжлт кеж болх. Юнгад гихлә, иим шинжлт кедг прибормуд мана танһчд дәкж уга. Эннь автоматическ анализатормуд. Энүнә дөнгәр ДНК-н кемжәнд генофонд шинжлж болжана. Цусна, хот-хоолын продуктын болн талдан чигн биологическ обьектмудын күцц биохимическ шинжлт кедг арһ учрв. танһчин селәнә эдл-ахун предприятьмуд хамцу нөкцлтин зура темдглж авцхав.
“Первомайский” СПК-н ахлач Валерий Болдыревин келсәр, эн факультетд үзсн шин оборудовань эннь иргч цага оборудовань болжана. Энүнлә көдлх кергтә. Энүнә дөнгәр тохма мал шинжлж болх.
“Адуч” нертә агрофирмин директор Батор Адучиевин келсәр, шин оборудованяр ямаран көдлмш кехин утскар ухалжанавидн. Энүнд малын хотын чинр шинжлж болх. Ода Хальмгин университетд экономикин делгрлтд туслх оборудовань бәәнә. Энүг олзлх кергтә.
Тер мет шин оборудовань инженерн-технологическ факультетин лабораторьт бас углж тәвгдв. Бензобур, георадар, бетоноскоп болн талдан чигн прибормуд тосхлтын организацсла хамцу нөкцлт кех арһ өгчәнә.
Хальмгин университетин доцент Анатолий Дорджиевин келсәр, деед сурһулин һардврин болн танһчин правительствин нилчәр, иим оборудовань хулдж авгдв. Танһчин организацст өөдән чинртә дөн күргх арһ бәәнә.
“Университет-номин халх-производств” нертә залһлданһар экономикин некрвлә ирлцәтә болн сән чинртә көдлмш күцәж болх, оютнрин сурһульд шин эв-арһ олзлж болжана. Университетин эрдм-сурһулин халх шинрүлж яслһна нег әнгнь — хамцу нөкцлт күцәлһн болжана. Энүнә нилчәр эрдм-сурһулин болн номин хоорндк залһлда батрулж болх. Билгтә баһчудт номин халхар көдлх урмд өгч болжана. Энүнәс иштә номин шинжлтын чинр өсх, эрдм-сурһулин программин чинр бас өөдлх.
Харлун Бадма, Эрнжәнә Эрднь
