Хальмгин оютнр Әрәсн бөк бәрлдлһнә марһанд орлцх
Хальмгин государственн университетин хамцу команд Воронеж балһснд һарч йовв. Тенд оютнр дунд бүс бәрәд ноолдлһна Әрәсән чемпионат болх. Энүнд спортын мастерин кандидатас өөдән цолта спортсменмүд дөрлдх зөвтә. Энүнә ашар диилвр бәрсн бөкнр болн призермуд Әрәсән команыдн ханьд Казань балһснд болх Универсиадт дөрлдх зөв авхмн.
Долан оют, тер тоод дөрвн спортын мастер Әрәсән ик чинртә марһанд Хальмг танһчин нер харсхмн. Дөрлдәнә дииләчнр болн призермуд Әрәсән бөк бәрлдлһнә хамцу командын ханьд орх зөв авхмн. Эдн командын ханьд эн жилин июль сард Кзань балһснд болх Универсиадын нарта-делкән марһанд орлцх. Тегәд чигн мана орн-нутгин хамгин сән гисн бөкнр арвн негн чиннүрин категорьт дииләчән йилһхмн. Тер бийнь хальмгин спортсменмүд эрк биш диилвр бәрх саната. Вольн янзар бөк бәрлдлһнә спортын мастерин кандидат Джал Батыревин келсәр, марһанд ноолхд күн болх. Хамгин сән бөкнр Казань балһснд дөрлдх зөв авх. Зәрм бөкнрлә урднь ноолдв. Кабардино-Балкаряс сән бөкнр ирх, тер тоод Әрәсән чемпион.
Марһанд ут-тоодан Әрәсән хөрн тавн регионас хйор зун тәвн бөк орлцх гиж хальмгин командын тренер Вячеслав Дорджиев цәәлһвр кев. Мана танһчин командыг нарта-делкән турнирин дииләч Очир Горяев һарджана. Хальмгин бөкнр чемпионатд һурвн сардан белдвр кецхәв. Иим эв-арһар бөк бәрлдлһнә һол күцлнь — бөк бәрлдлһнә цуг эв-арһс, тер тоод келн-улсин болн талдан чигн эв-арһ негдүлһн болжана. Хальмгин университетин командын тренер, физическ культурин кафедрин ассистент Вячеслав Дорджиевин келсәр, баһ наста бөкнр хамгин түрүнд диилвр бәрх күцлтә болх зөвтә. Цуг арһ чидлән агсж ноолдх кергтә. Ямаран белдвр кеснь тенд медгдх. Әрәсән командын ханьд орх зура бәәән. Универсиадт дөрлдх күцл тәвгдв.
Бүс бәрәд ноолдлһнд хойр эв-арһ олзлгдна. Вольн янзар бөк бәрлдлһнд спортсменмүд хойр һаран бүс бәрж авад, көл сәәнәр олзлна, дегәлж болх. Классическ янзар бөк бәрлдлһнд болхла көл олзлж болшго. Санкт-Петербург балһснд болсн келн-улсин бөк бәрлдлһнә чемпионатын дииләч Дима Кутушовин келсәр, һурвн сардан белдвр кегдв. Ода цуг бөкнр ноолдхдан белн. Тенд диилвр бәрх саната һарч йовжана.
Бүс бәрәд ноолдлһн неолимпийск спортын тоод орулгдв. Энүг хойр минһн һурвдгч жилсә авн сергәж босхжана. Иим эв-арһар олн келн-улс ноолдхдан дурта. Болв йосна чемпионатмуд болн марһан угаһар бүс бәрәд бөк бәрлдлһн делгрлт авшго.
Гольдина Ирина, Настан Сергей
