Элстин сурһульчнрин зургудын болн шинжлтын көдлмшин марһан болв
Хол болн өөрхн Төвд. Иим нертә марһан Элст балһсна сурһульчнр дунд болв. Энүнд хотл балһсна школмудын тәвн көвүн-күүкн орлцв. Эдн хойр номинацар дөрлдв — зурачнрин болн шинжлтын көдлмшин дөрлдәнд диилчән йилһв.
Йисдгч классин сурһульч Мария Герасименко Төвдин орн-нутг өөрднрин болн хальмгудын туужд нерәдлһтә шинжлт кев. Энүнд хойр келн-улсин туужд Төвдин орн-нутг ямаран орм эзлжәхин болн ямаран чинр зүүжәхин тускар цуглрсн әмтнд болн жюрин гешүд келж өгв. Энүнә төлә кергтә материал олн-зүсн статьяһас, очеркмудас болн номин шинжлтәс цуглулж авч. Иим көдлмш кехин төлә бүкл сар кергтә болв.
Мариян келсәр, көдлмшин һол күцлнь — буддийск цутхлнгла хальмг улсин шажна залһлдан яһж батрулгдсна туск төр шинжлһн болжана. Мария Герасименко келсәр, Хальмг танһчд бәәршлжәнә. Энүг төрскн һазран гиж тоолжана. Олн әмтн уул авьясан-зангшалан күндлх зөвтә, шажн делгрлт авх зөвтә. Тиигхлә шажна хәрлцән делгрлт авх, кесг әмтнә ухан чикрх.
Төвд цасна орн-нут нертә зурачнрин марһанд арвн зурһан-арвн долан наста сурһульчнр дунд хөрн негдчг школын элч Савр Бутиков билг-эрдмән үзүлв. Эврәннь көдлмштән Сул Төвд гидг нер өгч. Энүнд довтлж йовх мөрд зурата. Эдн сул үлмә уга бәәлһнә темдг болжана. Мань умшжах гелнгүд үзж болх. Марһана орлцачин тоолврар, ода төвд орн-нутгин күн болһн төрскн һазран үлмә уга бәәхин төлә ухалж санажана. Энүнә тускар зургдан медүлх күцл тәвж. Келхд, зург зурдг эрдмәр һурвдгч классас авн соньмсдг болв. Савр Бутиковин келсәр, зург зурхин төлә ке-сәәхн өнгтә шир шүүж авч. Ноһан өнг — байр үүдәнә.
Элстин хойрдгч школд болсн Хол болн өөрхн Төвд нертә хотл балһсна марһанд билгтә олн баһчуд билг-эрдмән үзүлв. Төвдин туужин тускар гүн медрл авч, олн-зүсн материал цуглулж ик көдлмш күцәв. Тер тоод хальмгудын сойлд төвдин искусствин болн талдан чигн төрмүдәр соньн көдлмш үзүлгдв. Элст балһсна администрацин эрдм-сурһулин заллтин методист Кермн Утаджиеван келсәр, марһана һол күцлнь — билгтә баһчудыг йилһж авлһн болжана. Төвдин орн-нутгин туужла бичкдүд өөрхн таньлдв. Зурачнрин марһанд бичкдүд Төвдин йиртмжин, мал-аһрусна болн эгл улсин бәәдл-жирһлин тускар зургудан зурх зөвтә бәәсмн.
Элст балһсна марһана дииләчнр февралин хөрн негнд болх танһчин дөрлдәнд орлцх зөв авхмн.
Ээнән Делгр, Хавтхна Анатолий
