Хальмгин деед сурһульд аспирантр сурчана

Әрәсән социальн-экономическ делгрлтин программд Президент Владимир Путин өөдән мергжлттә номин специалистнр белдлһнд ик оньг тусхажана. Мана танһчд иим специалистнриг Хальмгин государственн университет белднә. Танһчин деед сурһульд аспиратнрин сурһулин ямаран таал бүрдәгдв?

Хальмгин университет завср угаһар эрдм-сурһуль дасхлһна политик күцәжәнә. Оютнр нег кемжән талдан кемжән орж сурчана. Деед сурһулин аспирантурин болн докторантурин әнгд мана үүдәгч баг бәәсн кемд тавн күн документан орулж өгв. Теднә тоод Платон Букаджинов. Хальмгин университет улан дипломар төгсәв. Аспирантурт орад, эцкиннь хаалһар йовхар шиидв. Платон техническ халхар цаарандан сурх саната.

Платон Букаджиновин келсәр, деед сурһульд авсн медрл аспирантурт сурх арһ өгчәнә. Иргчдән докторск цол харсх саната. Эннь күнд төр болшго. Университетд авсн медрл туслх зөвтә.

Ода университетд аспирантурин хөрн йисн болн тавн докторантурин программ күцәгджәнә. Тер мет һазадын ордудын элчнр бас сурһуль энд дасчана. Ода Хальмгин государственн университетин һол күцлнь — өвәрц сойл хадһлж делгрүлһнә эв-арһар дамжулж номин шинжлт кеж, инновационн төсв орулж номин специалистнриг белдлһнә керг болжана.

Хальмгин университетин аспирантурин болн докторантурин әнгин ахлач Татьяна Кекееван келсәр, ода Хальмгин университетд Әрәсән цуг деед сурһульлла әдл аспирантурт болн докторантурт баһчуд орулж авгджана. Эднә шүүвр августын хөрнәс авн хөрн йисн күртл болх.

Августын хөрн йиснд эдн аспирантурт орулж авгдх. Сентябрин нег шин күртл Әрәсәд эрдм-сурһулин шин закан үүлдврт ортл аспирантурт баһчуд орулж авгдх. Шин закаһар ик сольвр болв. Ода заочн кевәр аспирантурт суч болшго. Түрүләд мергжлтин көдлмш харсгдх. Аспирантин диплом авсна хөөн кандидатск цол харсж болх.

Номин специалистнриг белдлһнә күцлд күрхин төлә номин болн номин багшин үүлдврт билгтә баһчудыг орулһна төлә сән таал бүрдәхин туст болн баһ наста номтнрин номин шинжлт дөннхин төлә деед сурһульд баһ биш көдлмш кегджәнә.

Ода аспирантурт сурхин төлә хөрн күн эрлһ орулж өгв. Эдн мана региона номин үүлдврт орлцсн деерән, Әрәсән номин кергт эврәннь тәвцән орулх саната.

Ээнән Делгр, Котина Валерий