Алексей Орлов эмчнрлә харһад күүндв
Эндр Жемчуевин нертә танһчин больницд эрүл-менд харлһна төрмүдәр тодрха күүндвр болв. Селвлцәнд танһчин эрүл-менд харлһна министерствин элчнр, райодын цутхлнг больницмудын ах эмчнр, танһчин толһач Алексей Орлов орлцв. Сүүрт һурвн төр хәләгдв. Эднәс һол төр болж эрүл-менд харлһна халхд өдгә цагин зәнглһнә систем оурлһна төрәр күүндвр кегдв. Иим системин нилчәр эмчнр гемтә улсин тускар ахр болзгт зәнг авч, эмнүлһнә тускар шиидвр авхд ик нилчән күргжәнә. Поликлиникин эмчин автоматизированн көдлмшин ормд эмчин хәләврт бичж авлһна, диспансерн то-диг авлһна, гемтә улсин электронн медицинск карт хәләлһнә керг кеж болх. Иим эв-арһар эмчнрт документмудла көдлхд амр болна. Ода эмнүлин учрежденьст компьютермуд хулдж авгджана. Эднә дөнгәр медицинск специалистнр шин эв-арһ олзлж көдлх. Тер мет танһчин эрүл-менд харлһна системин то-диг эд-бод кедг цутхлнг бүрдәлһнә көдлмш кегджәнә, талдан чигн өдгәц агин некврлә ирлцәтә залһлдан олзлзгдх.
