Хальмгин баһчуд цергт морджана

Эндр призывникүдин цугәрәсән өдр. Нег минһн күн эн намрар Әрәсән цергт мордх. Эндр хотл балһсна Буревестник стадионд дунд эрдм-сурһулин завденьсин оютнрин төлә сурһулин болн дамшлтын керг-үүлдвр болх. Иим керг-үүлдврин һол төрнь — цергт мордх баһчудт төрскнч сурһмж өглһнә болн физическ культурар болн спортар дорас өсж йовх баһчудыг соньмсулх күцл тәвгджәнә.

Зурһадгч тойгта эрдмин лицейин кадетск классин көвүдт ода сурхд амр болв. Эдн өдр болһн цергә белдвр кеж, Әрәсән әәрмд яһж церглхин тускар сәәнәр меднә. Тегәд иим сурһулин кемд эдн йоста сән мастер-класс болхинь күләнә. Элст балһсна талдан дундын эрдмин сурһулин заведеньсин баһчудт невчк күнд болна. Цергт белдлһнә көдлмш энд зуг физическ культурин болн ОБЖ-н кичәлмүдт болна. Иим кичәлмүдт көвүд-күүкд нурһлж цл.огц-махмудан батрулна. Иргчдән финансист болж көдлх Иван Морозовин тоолврар, иим олз-туста сурһулин ашт баһчуд цергт кергтә эрдм болн медрлын дамшлт авч чадх. Тер мет Хальмгин цергә комиссариатын көдләчнр иим сурһулин олз-тусин тускар йир сәәнәр меджәнә. Цергт мордх көвүд чанһ чиирг болхла, цергә күнд бәәдл-жирлһин сәәнәр дааж һархмн.

Өдгә цагт дундын школмудт цергә кергин шишлнг кичәлмүд уга болв чигн, мана танһчин салдснр цергт йилән сәәнәр церглнә. Баһчудын төлә иим кергтх сурһулиг Хальмгин баһчудын, спортын болн туризмин министерств, цергә комиссариат болн ДОСААФ-ин региональн әнг бүрдәж давулв. Эндр болсн дамшлтын сурһулин йовудт цергт мордх көвүд зергләнд йовх эрдм дасх, бууһас төв хадг, Калашниковин автомат цуглулһна эрдм дасж авсн деерән, талдан чигн цергт кергтә эв-арһ дасж авхмн.

Татьяна Дмитриева, Котина Валерий