Алексей Орловин пресс-конференц дөрвн шаху частан болв
Элст балһснд правительствин герт Хальмг танһчин толһач Алексей Орлов журналистнрла пресс-конференц кев. Келхд, иим күүндвриг танһчин һардач жил болһн кенә. Эн жил һурвдгч конференц болв. Энүнд давжах жилин аш диглгднә. Пресс-конференцд танһчин олнд зәнглһнә цуг эв-арһсин элчнр орлцв. Тер мет энүнд федеральн журналистнр бас орлцв.
Хамгин түрүн болж Хальмг танһчин правительствин ханьд орх улсин туск сурврт Орлов хәрү өгв. Эн сурврт нег частан хәрү өгв. Энүнә зәнглсәр, хуучн министрмүдин кабинетас дөчн процентнь шин правительствд орх. Тер тоод эрдм-сурһулин министр Лариса Васильева, селәнә эдл-ахун министр Петр Ланцанов, эрүл-менд харлһна министр Владимир Шовунов, финансин министр Надежда Глушкина болн жилишн-коммунальн эдл-ахун министр Нелли Ткачева эдн цаарандан көдлх. Министрмүдин кабинетин талдан гешүд удл уга шиидгдхмн.
Хальмг танһчин толһач Алексей Орловин келсәр, политическ чинр тоод авлго, министерствсин, ведомствсин һардачнр, чиновникүд болн правительств улсин бәәдл-жирлһин чинр өөдлүлһнә тускар ухалх зөвтә.
Тер мет административн халхар бас сольвр кегдхмн. Алексей Орловин темдглсәр, иргч жилин январин нег шинәс авн администрацин штат хасгдх. Тер мет тогтагдх шин церглтс толһачин үүлдврин төрмүд халһх. Хамгин түрүнд танһчин халһх төрмүд дала, тер тоод политическ, административн халхар күцәх көдлмш бәәнә. Нег үлү олнд зәнглһнә эв-арһсла бас көдлмш шинрүлгдх.
Хальмг танһчд ямаран парламент кергтә? Иим сурвр Хамдан телеканалын директор Владислав Сельнинов өгв. Иргч жилд хуралын депутатнрин сунһвр болх. Алексей Орловин келсәр, мана танһчд олз-тустаһар үүлдх хурал кергтә. Эн туст шин хәләц кергтә. Ода көдлжәх цуг депутатнр күцәх үүлдврхн сәәнәр меджәнә. Иргч хуралын ханьд шин улс орх ицл бәәнә.
Шинкн кергән эклсн фермермүдт яһж государственн дөн авхмн. Иим сурвр пресс-конференицн цуг орлцачнриг гилтә үүмлжәнә. Танһчин толһач Алексей Орловин келсәр, иим программ ода көдлжәнә, зуг энүнә тускар олн әмтн медхш. Өдгә цагт мана танһчд зурһанг минһн фермер бәәнә. Эдниг цугтаһинь программар дөннж болшго. Дөнцл мөнг өгсн улсин тускар ил кеәвр бичх кергтә. Иим мөнг авх саната улс эврәннь үүлдврин тускар телевизорт болн газетд келж өгх зөвтә.
Пресс-конференцин йовудт журналистнр селәнә эдл-ахун, эрүл-менд харлһна, социальн чинртә тосхлтын, танһчин улсиг сән чинртә уудг усар тетклһнә төрмүдәр сурврмуд өгв.
Хальмгин толһач Алексей Орловин зәнглсәр, әмтиг үүмлжәх цуг төрмүдиг шин правительств ахр болзгт хаһлх зөвтә. Дәкәд болхла эдн инвестиционн программ бас күцәх неквр тәвгджәнә. Болв хамгин һол кергнь — селәнә эдл-ахун халх делгрүлх төр болжана.
Цуг эн төрмүдин ахр болзгт танһчин шин правительств хаһлх зөвтә гиж Алексйе Орлов темдглв. Тер мет инвестиционн төсвсиг эдлврт орулһна цуг төрмүдиг бас шин министрмүдин кабинет халһх зөвтә гиж Орлов келв. Болв мана танһчин һол төрнь — ода селәнә эдл-ахун халхиг шинрүлж делгрүлһнә төр тәвгджәнә.
Арстана Светлана
