Хальмг уяч-модельер Канны балһснд болсн фестивальд Гран-при шүүж авв
Апрель сарин хөрн нәәмнәс авн май сарин йисн күртл Канны балһснд болсн «Салют талантов» нерәдллһтә нарт делкән фестивальд уяч модельер Валентина Татнинова Гран-при шүүж авв. Эн фестивальд орлцхар Әрәсән йисн регионас әмтн ирв. Хальмг келн улсин костюм — гидг номинацд эн күүкд күн диилвр бәрв.
Жил болһн Канны балһснд давулдг фестивальд олн әмтн ирнә. Энүнд урчнр, дуучнр, уянр билг эрдмән үзүлж марһлдна. Диилвр бәрх санан уга билә — гиж маднд уяч Валентина Татнинова келж өгв. Филологическ сурһульта Валентина Александровна арвн хойр жил хооран мөнгн бичкн болад бичкн ателье секв.
Валентина Александровна уячин эрдм чиләсн уга билә, эврә арһарн бичк бичкнәр хувц хунр уяд, эндр өдр тиим марһанд орлцх шиидвр авб.
Хальмг улсин өдр болһн өмсдг хувцн нәәрт олн зүсн байрт өмсдг хувцас йилһрнә. Күүкд күүнә өмссн бүшмүд кедү хавтхта бәәх зөвтә, ямаран, яһж хальмг махла өмсдг билә. Цуг эн келсн тоотс жүрин гешүдт таасгдв. Фестивалин жюрин гешүдт Валентина Александровна хальмг улсин хадг бәрүлж белглв. Дуран, цуг седклән өгхлә уйсн кегдл, хувцн йоста искусствин үүдәвр болж һарна-гиж уяч келнә.Иим кегдлмүд күүнә һарин дула хадһлж, энүг олзлжах улст йоста байр үүдәнә. Сән болн билгтә эрдмч мел әдл кегдл кедго үүдәвр болһндан өвәрц шин янз орулж кеерүлхәр зүткнә.
Өдгә цагт олн әмтн өдр-бүүрин көдлмш кесн цагт адһад-шидһәд, тогтуртаһар сууж, нәрн көдлмш кехш. Уячин көдлмш талдан көдлмшәс йилһнә, уячнр адһлго тохнятаһар көдлмшән кеж, цуг седклән тусхаж, өвәрц хувц хунр уйж һарһна.Эндр өдр Хальмг Танһчд ирсн гиичнр олн зүсн ке сәәхн тоотс хулдж авхар шунна. Валентина Александровна хадг, ке сәәхн әрәтә альчур, хальмг туг уйж һарһна. Арвн хойр жилин эргцд Валентина Александпровна кесг дипломар ачлгдв. Өрхн элгн саднь эндр өдр цуг дөн нөкдән күргж , диилвр бәрснднь байрлна. Уйсн кегдлмүдән нурһлж өөрхн улстан, элгн-садндан белглнә, олн-зүсн байр болхла белгүд кенә. Иргчдән Валентина Александровна Париж балһснд болх фестивальд орлцх сана зүүжәнә.
Светлана Аджиева, Валерий Котинов
