Хальмг Танһчин школмудт агроклассмуд көдлжәнә
Хальмг Танһчин школмудт агроклассмуд көдлх. Тиим шиидвр хойр жил хооран Москва балһснд болсн харһлт деер танһчин толһач Алексей Орлов болн Әрәсән эрдм-сурһулин, номин болн сойлын министр Андрей Фурсенко хойрин харһлтын йовудт батлж авгдсмн. Эндр өдр эн программ танһчин 5 райодт көдлжәнә.
Эн жилә сурһулин жил эклснәс авн Целинн района Оватан дундын школын ах классин күүкд-көвүд сурһулин цаган нурһлж салү-салү .давулдг болцхав. Энүнә учрнь агроклассмудин үлдлһн болжана. Эндр өдр күүкд адамчин эк тәрлһнә эв-арһ дасчана. Өдр болһн шин-шин тоотла эдн таньлдна.
Мана күүкд ю болвчн кеж чадна, олн-зүсн цецгәс урһана. Иргчдән эднәс сән, дамшлтта герин эзн күүкд улс болхмн гиж багшнрнь келнә. Цуг эн тоот эднә бәәдл-жирһлд эркн биш кергтә болх гиж күүкд бииснь тоолжана.
Күүкд олн-зүсн зер-земш тәрлһнә эв-арһ дасчах кемд көвүд болхла, тәрә тәрлһнә эв-арһин көдлмшлә таньлджана. шишлнг кабинетмудт эднд селәнә эдл-ахун техник юунас тогтдгинь цәәлһж келж өгнә. Энүнә хөөн эдн багшнртаһад селәнә эргнд бәәх крестьянск-фермерск эдл-ахуст күрч дамшлт хоршач. .селәнә эдл-ахун специалистнрас сүв-селвг авцхана.
Бәәрн Крестьянск-фермерск эдл-ахусин толһач көвүдт техник һарһж өгнә. Көвүд болхла кичәлдән хоршасан дамшлттд хүврәнә. сурһулин жилин эргцд 40 час эн керг-үүлдврт һарһгдна.
Селәнә муниципальн һардачнр бас эврә халхасн оньган тусхажана. Дамшлтин көдлмш давулхин кергт зун минһн гектар һазр һарж өгхәр зуралжана. Федеральн программас иштә эрдм-сурһулин халх делгрүүлһнә төриг һол оньгтан авч селәнә бәәрн муниципальн һардачнр техник хулдж авлһнд хойр сай арслнг мөнг һарһж өгхәр зуралжана гиж школын директор Марина Бодраева келнә. Селән һазрт өдгә цагт сурһульта агрономнр, зоотехникүд кергтә. Баһ наста специалистнриг селәнд көдлгхин кергт деерәс бас дөнг кергтә. Өдгә цагт йисдгч классин күүкд-көвүд оданас авн олн-зүсн эв-арһсла таньлджана. Тегәд 10-11 класст ортлан эдн баһ биш дамшлт хоршаж авчана гиж директор цааранднь күүндвртән темдглв.
Иим шишлнг классмуд танһчин район болһна школмудт сегхәр зуралгджана. Тиим школмудиг раона эрдм-сурһулин әнг бәәрн района муниципальн бүрдәчнрин һардачнрла хамдап йилһж авцхахмн. сурһуль өггдснә хөөн күүкд-көвүд шүүврт орад, шүүврән сәәнәр өгснь шишлнг агроклассин эрдм авсн сертификат авхмн. Иим шишлнг класс төгсәсн баһчудт эн залхар деед сурһульд орад сурх арһ бәәнә.
Хөөннь эдн селәндән ирж көдлхмн. эн халхар региона эрдм-сурһулин министерств деед сурһульд орх , ямр чигн халхар дөнгнх седклтә. Хамгин түрүнд мана танһч селәнә эдл-ахун халхар үүлддг регион болжана. Тегәд эн халхин специалистнр танһчд эрк биш кергтә. Энүг учртан ав иим көдлмш күцәжәхнь сән йовдлд. Танһчин иргч бат уулта болхнь маһд уга.
Санкун Кермн, Ирчин Алексей
