Хальмг танһчд эрүл-менд харлһна халх шинрүлһнә программин һурвн девснгин негнь экләд күцәгдх
Хальмг танһчд удл уга эрүл-менд харлһна халх шинрүлһнә программин һурвн девснгин негнь экләд күцәгдх. Эн саамд меди цинск учрежденьст зәнглһнә эв-арһ шинрүлгдхмн. Ода зәнглһнә эв-арһар көдлжәх компаньс дунд Хальмг танһчин эрүл-менд харлһна министерств марһа зарлхдан белн.
Ода эмчин хәләврт орхин төлә поликлиникд кесгтән чеерүдт зогсх кергтә болжана. Нег үлү шишлнг эмчд орхин төлә хойр-һурвн өдр кергтә болна. Өрүн эрт лор-эмчд, эндокринологд эс гиж нүднә эмчд орх талон күн болһн авч чаджахш. Өрүн хар өрлә ирәд, тало авчкад, эмчд орхла, эмч гемтә улст кергтә оньг тусхах арһ уга болна. Гемтә улсин амбулаторн карт бичхин төлә бүкл көдлмшин өдр үрнә. Зәрмдән эмчнр эн көдлмшиг гертән авад, күцәнә. Тегәд эн халхар эмчнр муурна, гемтә улс чигн зовжана. Болв иргч жиләс авн эн туст бәәдл ясрх зөвтә. Элст балһсна эрүл-менд харлһна заллтин ахлач Руслан Нагиевин келсәр, хотл балһснд иим көдлмш кехин төлә һурвн сай зурһан зун минһн арслнг йилһж өгх зура бәәнә. Түрүләд техническ халхла кергтә заллһдан орулгдх, оборудовань углж тәвгдх. сервермуд көдлх. Иим арвн аппарат ирх зөвтә. Зун тәвн зурһан көдләчнр көдлх.
Балһсна эрүл-менд харлһна әнгин һардачин темдглсәр, цуг эмчнр ручкар бичснлә әдл компьютерар сәәнәр көдлж чадх зөвтә. Кемр медицинск көдләчнр компьютер мууһар меддг болхла, эн жилин чилгч күртл иим эрдм дасж авх төр тәвгджәнә. Шин жиләс авн амбулаторн картмудын хөрн нәәмн процентнь компьютерт орулгдж, бичгдх зурата. Эн кемд мана танһчд эрүл-менд харлһна учрежденьс шинрүлһнә көдлмшин түрүн девснгнь төгсәгдх зөвтә. Эрүл-менд харлһна халх шинрүлһнә программ нег жилдән күцәгдснә хөөн, иим ик хүврлт болх зөвтә. Хальмг танһчин эрүл-менд харлһна министрин цәәлһсәр, иим систем цуг Әрәсәд орулгджана. Тегәд эн көдлмшиг ахр болзгт төгсәх даалһвр өггдв. Энүнә төлә мана танһчд жирн дөврн сай асрлнг йилһж өггдхмн. Иим көдлмш кесн предприятьмуд оборудовань углж тәвснә хөөн тер дарунь авшго. Иим оборудованяр көдлх специалистнриг сурһсна хөөн болн систем экләд көдлснә ашт эдн мөнг авч чадх. Хальмг танһчин эрүл-менд харлһна министр Владимир Шовуновин келсәр, медицина халхиг шинрүлһнә программин түрүн девснгд танһчин цуг эрүл-менд харлһна учрежденьс, Яшалтинск, Үстин болн Сарпинск райодын больницмуд орх.
Танһчин улст медицинск туслмж күрглһнә чинринь өөдлүлһнә программд эн девнг түрүн ишкдл болжана. Ирх жиләс авн гемтә улсиг эмнр тохнятаһар оньган өгч хәләж чадх. Кергтә болхла эмнр өдр-сө уга көдлх зура бәәнә. Иим таалд гемтә улсин бәәдл-жирһлин диг-даран сольгдшго. Гемтә улсиг эмнүлһнд цуг таал бүрдәх күцл тәвгджәнә.
Хавтхна Элла, Очра Сергей
