Хальмг Танhчд бачм бәәдл зарлгдв
Эн өдрмүдт догшн һан — халун болсна ашт тәрән хасгчана, олна малд үвлд күрх хот малчнр белдж авшго. Урһц хагснас көлтә Хальмг Танһчд бачм бәәдл зарлгдв. Июнь сарин 14-д Танһчин правительствд болсн сүүрин деер тиим шиидвр батлсн билә. Һан халун эклсн кемд Хальмг Танһчин эдл ахун министерствин специалистнр һазр малтсн билә, эндр өдр нег метрин һазрин гүүнд 46 милиметр күртл һазр хагсу гиж специалистнр зәнглжәнә. Энүнә ашт урһсн урһц усн уга тер дарунь хагсч одна. Һан халун болсн ашт 120 һар минһн гектарин аһуд урһц үрв. Эннь 47% болжана. Тиим бачм бәәдл танһчин 11 райодт тогтв; энүнд Городовиковск, Ик-Буурла, Баһ Дөрвдә, Көтчнрә, Приютна, Сарпан, Целинн, Үстин, Яшалтан, Октябрьск болн Яшкульск райод орв. Ода танһчин малчнр, фермермүд эн дуту-дундсиг тоод авад хур чик орхла намрин тәрән суулһх саната. Бачм бәәдл тогтснас көдлтә эндр өдр Танһчин эдл ахун министерствин ахлачнр банкин ахлачнрла күүндәд кредит авхар зуралгджана. Дәкәд болхла, региональн ахлачнр Әрәсән правительствд дөн болтн гиж хүврәлһән илгәх.
