Хальмг көгжмчнр «Жемчужина Европы» нертә нарт-делкән фестиваль-марһанд диилвр бәрв

Элст балһсна бичкдүдин үүдәлтин школын сурһульчнр Прага балһснд болсн «Жемчужина Европы» нертә нарт-делкән фестиваль-марһанд орлцад ирв. Энүнд Македонин, Украина норн-нугудын болн Киров, Казань, Волгоград, Новосибирск балһсдудын көвүд-күүкд дөрлдв. Хальмгин билгтнр сән үзмж бәрв.

Арвн наста Нора Куксова фортепианод йир сәәнәр наадна. Европин әмтн энүнә билг-эрдмиг өөдәнәр үнлгдв. «Жемчужина Европы» нертә фестивальд Нора «Сольное исполнительство» нертә номинацд һурвдгч орм эзлв. Ангира Бочкаева болхла түрүн девснгин диплом шүүж авв.

Нора Куксован келсәр, йир үүмәтә билә. Зуг заалд суусн әмтн намаг дөнгнв.

Хальмг танһчин нериг эн марһанд һучн дөрвн күн харсв. Эднлә Македонин, Украинан, Чехин орн-нутгудын болн Әрәсән балһсдудын билгтнр дөрлдв. Тер мет «Келн-улсин би» номинацд болн ду дуулһна девснгд сән үзмж бәрв. Нег үлү, Руслан Бананов йилһән сәәнәр баян татад, нүүрт һарв.

“Эрвәкә” ансамблин һардач Людмила Манжикован келсәр, Европин әмтн түрн болж хальмг келн-улсин би үзв. Эднд йир таасгдв. юнгад гихлә, урднь Әрәсәһәс ирсн коллективмуд орс-келн улсин би тәвдг билә.

Прага балһснд болсн фестиваль элстин бичкүдин үүдәлтин школын сурһульчнр йоста байр болж медгдв. Келхд, көвүд-күүкдин ик зунь түрүн болж талын һазрур йовв. Сурһульчнрин келсәр, Чехин орн-нутг йир таасгдв. Эдн бәәрн улсин туужла, сойлла таньлдв.

Кесг экскурьст одвидн. Дрезден балһснд бас биләвидн. Келхд, талын һазрт хальмг танһчин улсла харһвидн гиж бичкдүд келнә.

Эндр баһ наста билгтнр фестивалин тускар келж өгсн деерән, эврәннь элгн-садндан кесг соньн белгүд белглжәнә.

Дмитрин Татьяна, Хулхачин Николай