Хаалһар йовлһна зокал эвдсн улс чанһ засгла харһулгдх

Сокту жолачнриг чанһ бүртклһнд авх. Соктуһар маши залсн күн һучн минһн арслнг ялд унх. Тер мет сентябрин нег шинәс авн административн зака эвдсн улсин ялын хамгин бичкн кемжән тавн зун арслнг күрх.

Мана зәнгчлә харһад күүндсн машидын эздүд иргч шин закана тускар меджәхш. Сокту жолачнриг чанһ засгла харһулхин тускар соннсн улсин ухан-тоолврнь әдл биш. Үлгүрнь, Троицкое селәнә бәәрн күн Николай Федотовин тоолврар, әмтнд үлү мөнгн бәәхлә иим закаг күцәшго. Полина болн Андрей Ветровихна келсәр, әрк-чаһр уудг авьясан хайж чадшго лус хамгин икәр мөнг өгхмн.

Николай Федотовин келсәр, шин закан чанһ неквртә болжана. Соктуһар маши залхш. Тегәд шин заканас әәжәхш. Полина Ветрован келсәр, бидн маши залнавидн. Мана өмнәс кен аашхнь медгджәхш. Кемр сокту жолач маши залхла би эврән, мини өррхн улс зовх. Тегәд правительств иим зака батлж авснь сән керг. Ялын кемжәг икдүлх кергтә, сокту улс маши залх зөв уга.

Шин закаһар түрүн болж административн ялла хамдан маши залдг зөв геех хойр засг дегц күцәгдхмн. Сентябрин нег шинәс авн соктуһар маши залж йовсн күн медицинск шинжлтд оршго саната жолачнр маши залдг зөвән геесн деерән, һучн минһн арслнг ял өгхмн. Сокутһар дәкәд нег бәргдхлә ялын кемжән тәвн минһн арслнгд күрх, һурвн жилдән маши залж чадшго. Шин закана зәрм статьяһар арвн хонгтан административн бәрәнд бәрх засг орулгджана.

Хальмг танһчин ГИБДД-н инспектор Василий Кекеевин келсәр, шин федеральн закаһар хаалһар йовлһна зокал эвдсн улсин административн ялын хамгин бичкн кемжән тавн зун арлснгд күрх. Кемр жолачнр хойрдад дегд түргн гүүлгхлә, эс гиж светофорин темдгин зокал эвдж һархла чанһ засгла харһулгдх.

Кемр урднь машина эзн автомобилян маши залдг цаасн уга күүнд өгхлә, зуг зун арслнг ял өгдг билә. Нег сар болад шин закаһар иим кевәр зака эвдхлә һучрн минһн арслнг өгхмн. Ялын кемжән һучн холванд өсх.

Хальмг танһчин ГИБДД-н инспектор Василий Кекеевин келсәр, ода шин закаһар нег литр һарһсн киид 0, 16 миллиграмм этилын спирт бәәснь жолач сокту гиж тоолгдшго. Эн кемжәнәс даву болхла жолач сокту гиж тоолгдна.

Шин закаһар тер мет дав зуурин маши залдг зөв уга кегдх. Сентябрин нег шинәс авн автоинспектормуд хаалһин зокла эвдсн жолачнрас маши залдг зөвин цаас авшго. Иим залачиг маши залдг зөв геехин туск зарһин шиивдр үүлдврт орсна өдр иим маши залдг зөвин цаасиг жолач эврән авч ирх зөвтә. Хаалһар йовлһна зокалын тускар дәкәд нег медрлинь шинжлснә хөөн болн медицинск шинжлтд орсна хөөн иим документ хәрү жолачд өгх. Иим чанһ зака бтлж авсн бас учрта. Сокту жолачнр орлцата хаалһюд зеткртә йовдлмудын то жил ирвәс өсәд йовна. Хальмг танһчд эн жилин зурһан сарин эргцд хаалһд хөрн нәәмн зеткртә йовдл учрв. Энүнд сокту жолачнр гемтә болж һарв. Шин закаһар чанһ засг орулсна хөөн хаалһд зеткртә йовудлмудын то баһрх зөвтә гиж автоинспектормуд нәәлжәнә.

Ээнән Ольга, Хавтхна Анатолий