Хальмгин бичкдүд Японьд одад, келнә дамшлт хоршав
Хальмг танһчин сурһульчнр болн оютнр японя кел дасхдан дурлжана. Одахн “Химавари” нертә Элст балһсна бичкдүдин цутхлнгин оютнр Японя орн-нутгас хәрж ирв. Зурһан күүкн тенд келнә дамшлт хоршав, японя келн-улсин сойлла, зангшалла болн бәәцин таалла таньлдв.
Японя орн-нутг зангшал бәрдг болн өөдән технологийта орн-нутг. Орс кел дасжах японя оютнрла харһад күүндснь хамгин икәр таасгдв. Гиичнриг бүләнәр тосж авснь йир икәр байрлулв. Иим үгмүд Альма Тюменева эврәннь нәәрүлж бичсн көдлмштән олзлв. Эн күүкн минь одахн Японя орн-нутгас хәрж ирв. Тенд Химавари нертә школын талдан сурһульчнрла хамдан японя кел дасв.
Альма Тюменеван келсәр, японя багшнр японя кел дасхв. Эннь эврән кел дасснас сән болна. Тедн эврәннь айлһар келнә. Нег сарин эргцд сән дамшлт авч чадв.
Японя кел дасх, өвәрц сойл медж авх арһ эднд Химавари нертә японь кел дасдг бичкдүдин цутхлнгин директор Светлана Гиляндикова бүрдәв. Дамшлтта багш арвн жилдән бичкдүдт японя кел дасхжана. Тегәд Японя орн-нутгт Светлана кесг дәкж одв. Иим келнә дамшлт хоршалһна сурһуль цутхлнгд хойр минһн хйордгч жиләс авн күцәгджәнә.
Химавари нертә японя кел болн сойл даслһна бичкдүдин цутхлнгин директор Светлана Гиляндикован келсәр, иим дамшлт хоршах кергтә. Химавари цутхлнгд сурһуль төгсснә хөөн бичкдүд японьд одна. Японя орн-нутгин сойлла өөрхн таньлдх арһ учрна, японцрас кел дасхд сән болна. Бичкдүд оданас авн эврәннь иргчин утскар санжана. Эн туст Японя орн-нутг дигтә ирлцжәнә.
Хальмгин зурһан оют “Фтаба” нертә японя хуучн школд японя кел даслһна дамшлт хоршав. Школ Чиба балһснд бәәнә. Бәәсн һазрасн күүкд школ күртл метроһар күрдг билә. Келхд, японя метро эврәннь эв-арһарн цуг нарта-делкәд хамгин жанһрта гиж тоолгдна. Тегәд чигн хальмгин күүкд метрод бәәх темдгүд умшад, бәәрн услас хаалһан заалһж авв. Эннь япоян кел дасхдг сән нилчән күргв. Сурһуль дассн деерән, мана танһчин оютнр олн-зүсн сойлын программд орлцв.
Мария Бюсамалиева келсәр, Токио балһснд “Диснейлендт” одх арһ учрв. Олн-зүсн келн-улсин байрт орлцв.
Хальмг танһчин сурһульчнр Японьд нег сар үлү бәәв. Эднәс хамгин бичкнь Аня күүкн. Зуг арвн һурвн наста. Болв оданас авн Японя деед сурһульд орхар ухалжана.
Аня Цебикован келсәр, япоян кел дасх слевг экнь өгв. Японя орн-нутгт одх арһ бәәсинь сонсад, иим холл һазрт йовх санан орв.
“Химавари” гисн үг япоян келнәс нарн цецг гиж орчулгдна. Ода Элстин бичкдүдин цутхлнгд сентябрин арвн тавнас авн шин сурһульчнр орулж авгдх. Японя кел, икебана, оригами эрдм дасх седклтә цуг улс цутхлнгд ирж чаджана.
Елена Алексенко, Котина Валерий
