Государственн көдләчнр хальмг би дасжана

Элст балһсна государственн көдләчнр хальмг улсин би биилдг эрдм дасжана. Эднә төлә шишлнг сурһуль бүрдәгдв. Эдн долан хонгт хойр өдр би дасдг сурһульд одна. Төрскн кел дасхлһна болн хадһлһна олан хүүвин гешүд хамгин түрүнд хальмг би дасхар седв.

Ямаран чигн цолд көдлжәсн бийнь, ямаран чигн наста болв чигн би дасж болх. Алексей Амбадыков тосхлтын заказчикин дирекцин һардач. Көдлмштән оньдин төсв, чертежмуд белднә. Сул цагтан амрад, чеежән сергәх дурн күрнә.

Энүнә келсәр иим сурһульд цөгц-махмудан яһж бәрхинь дасв. Иим сурһульд биилдг дасхсн деерән, бииһин әнг болһна чинринь медж авхд туслна. Бииһәр дамжулад бидн эрәннь келн-улсин уул сойлан, авг бәрцән медж авнавидн.

Алексей Амбадыковла әдл хальмг улсин би дасж авх һучн күн бәәнә. Эдн цугтан хотл балһсна администрацин көдләчнр. Эднә тоолврар, хамгин түрүнд хальмг улсин көгжм медж шингәж авх кергтә. Хальмгин хүрмд эс гиж талдан байрт биилжәсн әмт хәләхлә, биилхд амр болж медгднә. Болв шинкн экләд биилжәх улст иим эрдм амрар ирхш. Тер бийнь хальмг би таасгдна.

Эн күүкнә келсәр, ода Чичрдг би дасжана. яһж ишкдл кедг дасж авч. Һаран чикәр бәрж чадна. Эн көвүнә келсәр, энүнә өмн хальмг би биилж чаддго бәәж. Медрлтә күн заахла цугнь медгднә.

Сурһулин багш Данзн Эрднеевин келсәр, би биилдг эрдм дассн цагт дасхл кергтә, эгл элементас күнд элеменд дасх кергтә. Данзн Элстин администрацин көдләч. Ода деерән эдн шинкн экләд хальмг би биилдг дасжана. Эннь нег өдрә керг биш. Тер бйинь биилдг дасж авх санан бәәнә.

Элстин администрацин сойлын заллтин ахлачин дарук Данзн Эрднеевин келсәр, хальмг күн болһн келн-улсин би биилдг чадх зөвтә. Оют цагтан биилдг дасж авч. Эннь хальмг күн болһнд цуснднь бәәнә.

Дассн бииһин эрдмән эдн хүвин дарани сүүрт үзүлж чадх. Админстрацин толһачин темдглсәр, олна хүүвин һол күцлнь — хальмг дууна болн бииһин марһасар дамжулж төрскн кел болн сойл тархаж хадһлһан керг тәвгджәнә.

Элстин администрацин толһач Артур Дорджиевин келсәр, сурһульд әнгсин һардачнр болн көдләчнр иржәнә. Хальмг би эдниг негдүлжәнә. Нааран ирсн әмтн муурхш. Хальмг би дурлж дасжана.

Хальмг улсин би өвәрц болн ке-сәәхн. Энүнд нарта-делкән цуг келн-улсин сойл шингрв. Тегәд чигн Элст балһснд олн-әмтнә би монһл келн улсин солйын зөөр нерәдлһтә нарта-делкән конференцд хамльг улсин бииг ЮНЕСКО-н сойлын зөөрин списскд орулһна төр хәләгдв. Ода танһчин сойлын министерств КИГИ РАН-ла хамдан кергтә материалмуд белджәнә. Тегәд хальмг бииг танһчин цуг әмтн дасж авх зөвтә.

Ээнән Ольга, Очра Сергей