Фортепьяно зер-зевд дуран өгсн көвүд күүкд хоорндан марһлдв
Шидр Элст балһснд фортепьяно зер-зевд дуран өгсн көвүд күүкд хоорндан марһлдж дииләчән йилһв. Эн дөрләнд балһсна болн Танһчин көгжмин школд сурһуль сурч йовх көвүд күүкд орлцв.Ут тоодан эн марһанд 70 билгтнр орлцв.
Карун Буйнта болн Үлмжин Виола һурвн жилдән көгжмин училишд сурһуль сурчана. Долан нас зүүж йовх Виола эн марһанд түрүн болж орлцжана. Виола күүкн болхла хойр дәкч иим ик чинртә дөрлдән орлцжана.
Түрүн секәтә балһсна фортепьяно зер зевд дуран өгсн бичкдүдин хоорнд давулдг көгжмин марһанд Элст балһснас болн Танһчин дөрвн районмудас болн Ставропольск областяс билгтә көвүд күүкд ирв. Ставропольк крайин көгжмин әнгин бичкдүдин үүдәлтин цутхлнгин ахлач Марина Бельченко келсәр Элст балһснд давулдг марһаст эднә күүкд дангин орлцна. Эдн сурһуль авсн бичкдүд мана бичкдүдлә әдл, бас йир билгтә.
Марһана йовудт көвүд күүкд фортепьяно зев зевд эврәннь наадан үзүлв. Хамгин түрүнд жүрин гешүд наачах бичкдүд яһж, ямаран кевәр бийән бәрдгнь хәләв. Дәкәд болхлаг энүнд эдн хоорндан нег негән яһж сонсдгнь шалһв. Эн керг үүлдвр олн улст байр үүдәв.
Жил болһн мана көгжмин училишиг кесг бичкдүд төгсәһәд талдан балһсд одад мана хальмг танһчиннь нериг туурулж йовна. Эн өдр хоорндан марһлдсн көвүд күүкдин иргч сән — гиж Элст балһсна көгжмин училишин ахлач Любовь Горяева келв.
Тер өдр Көгжмин училишд өрүн эртәс авн сәәхн көгжм сонсгдв. Эн марһанд орлцсн көвүд күүкд даалһсн даалһвран йилһән сәәнәр күцәв. Диилвр бәрсн баһчуд күндллһнә һашгар болн мөнгнә мөрәһәр ачлгдв.
Дмитрин Татьяна, Хулхачин Николай
