Эсто-Алтайск школын гер яслһна көдлмш төгсжәнә

Яшалтинск района Эсто-Алтайск школын гер шинрүлһж яслһна көдлмш төгсхдән өөрдж йовна. Селәнә школ хуучн школмуд шинрүлһнә федеарльн программд орв. Тегәд чигн энд капитальн ясвр кегдв. Эн мөнгәр школын герин һазадк эрсн шинрүлгдв, герин ора сольгдв, шин трез-үүдн углж тәвгдв, клаасмудын хораст сән чинртә ясврин көдлмш кегдв.

Хойр сар хооран энд тас талдан бәәдл билә. Школын директор Галина Сасыкован келсәр, школын герин эрсн нурад унжала, хуучн терз бас му бәәдлд тусв. Далдгч жилмүдт тосхсн школд капитальн ясвр кех кергтә бәәсмн. Эн жилмүдин эргцд жил болһн бичкн ясвр кегдәд, шинрүлдг билә. Эндр өдрт эн сурһулин заведень районд хамгин ик гиж келж болх. Ода энүнд зун найн сурһульч сурчана. Тосхачнр ясврин йовудт трез-үүд сольв. Ода Эсто-Алтайск школын гер таньдгдшгоһар шинрүлгдв.

Школын директор Галина Сасыкован келсәр, тосхачнр школын герин оар шинрүлв. Урднь хур орхла дусал дусдг билә. Ода болхла хагсу сән болв. Ода болхла туалет кех көдлмш үлдв, столовин гер бәрх кергтә. Эндр өдрт арвн сай арслнг олзгдв.

Ода школын герт пластикин шин терз углж тәвгдв, школын һаза асфальтированн плошадк бәәнә, шин үүдн тәвгдв. Столовин герт болхла ода күртл ясврин көдлмш кегджәнә. Сурһульчнрин хот уудг хора икдүлх күцл школын директор өмнән тәвсн бәәж. Ода энүнә ухан-санан бәәдл-жирһлд тохражана. Энүнә төлә котельн бәәсн гериг столовд өгв. Ясврин хөөн энд бәәцин цуг таал бүрдәгдх. Сурһульчнр тосхачнрин кесн көдлмшиг таасжана.

Эн күүкнә келсәр, школ дегд сәәнәр ясгдв. Шин терз-үүдн бәәнә. һаза асфальт кев. Ода көвүд-күүкд гүүхләрн бүдршго. Школ тас талдан бәәдл һарв, цугнь шин. Шин пластикин терз тәвснә хөөн, класс сарул-герлтә болв. Энд сурхд тааст болв гиж эн көвүн келнә.

Түрүн авгтан школын герин проектд актов зал уга бәәж. Столин гер болн актов зал негдәд нег хорад бәәсн билә. Тегәд чигн сойлын керг-үүлдврмүд бүрдәж давулхд жанһрта бәәсмн. Ода актов зал салу бәәх. Физкультурин кичәлмүд болхла шинрүлгдсн спортивн залд давулгдх.

Школын директор Галина Сасыкован келсәр, района администрацин, эрдм-сурһулин әнгин һардачнрин дөнгәр школ федеральн программ орв. Котельн урднь бәәсн гер шинрүлж, столовд өггдх. Энд хот кедг һазр, сурһульчнр хот-хол уудг хора салу бәәх. Энүнд терз-үүдн сольгдв. Шин плиткс делггджәнә. Столовин көдләчнрин төлә туалет болн бийән уһадг хора кегдх. Тер мет хот-хол хадһлдг склад бәәнә. Урднь иим склад уга билә.

Школын һазадк эрсн сурһульчнриг, багшнриг болн эк-эцкнриг ик кезәнәс авн үүмүлжәлә. Ода бәәдл сольгдв. школын герин дотр болхла коридорт ясвр кегдж, туалет болн һаран уһадг хора бәәнә.

Наталья Кочеткован келсәр, школд туалет кеснь сән керг. ода үвлин кемд бичкдүд һаза һаршго. школын һаза асфальт делглв. Ода бальчгта цагт эдн цеврәр школдан орж чаджана.

Хойр сар хооран Эсто-Алтай селәнә әмтн икәр сурһульчнр сентябрин нег шинд школд сурч чадхий аль угай гиж алмацжала. Ода тосхачнр ясврин көдлмш төгсәжәнә. Удлу га актов залд, столовд болн спортивн залд цуг ясврин көдлмш төгсх.

Батан Санжирма, Хулхачин Николай