Элст балһсн зун дөчн нәәмдгч өөнән темдглх

Манһдур Элст балһсн зун дөчн нәәмдгч өөнән темдглх. Хотл балһсна улсин болн гиичнрин төлә ке-сәәхн шоу, карнавал, ретро дискотек болн талдан чигн байрин керг-үүлдврмүд бүрдәж давулгдх. Эрдм-сурһулин зәрм учрежденьст байрин өмн өргнд энкр балһсндан нерәдгдсн һәәхүлмүд секгдв. Хөрн һурвдгч школд “Скульптурное убранство” Элисты нертә һәәхүл белдгдв.

Эн жилин школын музей хөрн жилин өөнән темдглжәнә. Эн цагин эргцд энүнд шин болн соньн предметмуд цуглулгдв. Хойрдгч классин сурһульчнрт Элст балһсна туужин тускар тодрхаһар келж өгв. Көвүд-күүкдиг хуучн фотозургуд икәр соньмсулв. Энүнд дорас өсж йовх баһчуд меддго балһсн үзүлгджәнә. Ода эдн эврәннь балһсна тускар тас талдан зургуд үзнә. Тер бийнь амрлһна дурта бәәрн тер кевәрн үлдв.

Бичкдүдин келсәр, Элст балһснд хамгин дурта һазр — цутхлнг тавлнг. Энүнә тоолврар, Элстин фонтан хамгин ке-сәәхн һазр. Дәәнә хөөн Элст балһсн му бәәдлд туссн билә. Ода болхла жил ирвәс сәәхрәд йовна гиж эн көвүн келнә.

Николай Баджаев сул цагтан һаза һарад цевр аһар кииләд, хотл балһсар йовхдан дурта. Энүнә келсәр, Элст балһсн энүнә бәәрн улсла әдл эврә жирһлтә, эврә амр биш намтрта. Иим балһсна байр күн болһнд теегин сувсн мет сәәхн балһсна туужин нег әнгнь гиж санхд уха тунһалһна. Энүнә тууж бичсн улсиг дәкәд нег тодлх саам учрна.

Николай Баджаевин келсәр, университетин комплекс, почтамт сексинь сәәнәр тодлна. Минь одахн болсн болж медгднә.

Хальмг танһчин сувсн мет сәәхн балһсн хальмгин у-өргн теегин талд дунд бәәнә. Элст гисн хальмг келнәс орчулхла песчаный гидг чинртә. Элст баһ наста балһсн. Энүнә делгрлт зуг давсн зун жилин хөрдгч жилмүдт эклв. Болв селән болж күсдундур зун жилин туужта. Мана үүдәгч баг Ленина нертә уульнцар йовхар шиидв. Эн уульнцас Хальмгин хотл балһсн экләд тосхгдсмн. Нег минһн нәәмн зун жирн тавдгч жилд энд зуг арвн тавн гер бәәж. Түрүн Элистинская нертә уульнц тогтв.

Туужин номт Арлтан Басхаевин келсәр, нег минһн нәәмн зун жирн хойрдгч жилд крестьянин Кийков Балы нертә хальмг күү селвгәр Элст балһсна салад эврәннь герән бәрж авла. Нег минһн йисн зун арвн хойрдгч жилд Элст балһснд телеграф орулгдв. Тер цагт балһсн делгрлт авсн цаг болжана.

Келхд, урднь бәәсн улан школын гериг нег минһн доладгч жилд бәрж. Номтнрин келсәр, эн гер балһсна йоста тууж болжана. Эн гер дәәнә цагла залһлдата. Ода иим гермүд хотл балһснд дегд ховр. Цаг ирвәс Элст балһсн кеерәд сәәхрәд йовна. Жил болһн гилтә хулд-гүүлгәнә ик цутхлнгуд, әмтн бәәдг гермүд өснә, сквер-аллеймуд балһс кеерүлжәнә.

Элст балһснд цугнь таасгдна, ке-сәәхн, әмтн бас цаг дахж хувц өмснә гиж эн күүкн келнә. Энүнә келсәр, хамгин икәр цутхлнг тавлнг таасгджана. Энд өрк-бүләрн ирж амрна. Хуучн цага балһснла дүнцүлхлә, ода хотл балһснд цевр, сәәхн болв. Энд бәәхд тааста болжана гиж эн келнә.

Өдгә цагин Элст балһсн политическ, экономическ, спортивн, номин болн оюни жирһлин цутхлнг болжана.

Ээнән Делгр, Ирчин Алексей