Эндр олн-әмтнә хуралын сүүрт танһчин правительствин шин ахлач Игорь Зотов шиидгдв

Эндр Элст балһснд Хальмг танһчин олн-әмтнә хуралын дарани дөчн негдгч сессин сүүр болв. Энүнд депутатнр хөрн негн төр хәләж, ирлцнһү тогтаврмуд батлж авх зөвтә. Сүүрт һол төр болж танһчин правительстин ахлачин туск төр хәләгдв. Эн үүлд танһчин толһачин селвгәр Игорь Зотовин нерн депутатнрин хәләврт орулж өггдв. Хальмг танһчин экономикин делгрлтин һол күцлин тускар Игорь Зотов тодрахаһар келж өгв. Энүнә темдглсәр, һол төр болж селәнә эдл-ахун делгрлтин кергт хамгин ик оньг өггдх. Тер мет федеральн мөнг орулж авлһнд шин премьер-министр бас кергтә оньг тусхах саната. Аштнь депутатрин дууһан өгсн хөөн, сессьт ирсн цуг хөрн зурһан депутат Игорь Зотовин кандидатуриг дөннв. Игорь Зотов далдгч жилд төрсмн, түрүләд Санкт-Петербург балһсна техническ университет төгсәһәд, инженер-электрикин эрдм авч, хойр минһн доладгч жилд Ломоносовин нертә Москван государственн университет чиләһәд, экномистын эрдмтә болж. Өрк-бүлтә, хойр үрән өскжәнә. Урднь танһчин экономикин министрин дарук болж көдлжәлә. Сессин сүүрт Хальмг танһчин толһач Алексей Орлов орлцад, үг келв. Хамгин түрүнд шин правительствин ахлач Игорь Зотовиг йөрәв. Алексей Орловин келсәр, танһчин экономик делгрүлһнд ик чинр өггджәнә, болв эн туст зуг түрүн ишкдл кегджәнә. Кех-күцәх көдлмш дала гиж толһач темдглв.