Эндр мөшклһнә органмудын көдләчнрин сән өдр

Эндр мөшклһнә органмудын көдләчнрин сән өдр. Дамшлтта, күүнә зөв харсдг, зака сәәнәр меддг улс полицд көдлх зөвтә. 49 жилин туршарт дотр-дундын кергүдин министерствин мөшкәчнр зака эвдлсн йовдлмудыг илткж, экстремизмла болн коррупцла ноолда кежәнә.

Зөв-йос харлһна органмудын көдләчнр байрин болн амрлһна чигн өдрмүдт көдлх саам эднд учрна гиж МВД-н заллтин мөшклһнә әнгин ахлач Басн Бадмаев келнә. Эндр эднә ик зунь эврәннь сән өдрән көдлмштән темдглжәнә. Эднд сул цаг уга болна. Мөшклһ ахр цагин болзгт кех кергтә. Тер мет бачм кевәр олн-зүсн кергүд бас хаһлх кергтә болна. Ямаран чигн зөв-йос эвдсн йовдлмудын туст герчлһ болн буру йовдл һарһсн улсин гемиг батлх кергтә болна.

Арвн дөрвн жилин эргцд Бадмаев кесг хулха кесн, күүнә әм авсн болн нань күнд йовдлмуд илткж чадв.

Басн Бадмаевин келсәр, эн церглтд көдлдг улсин көдлмш нәрн болжана. Сар болһн эдн 10 шаху керг хәләж илктх зөвтә болна.

Урднь Басн Бадмаев Хар һазра района уголовн хәәврин әнгд көдлдг билә. Тер дарунь мөшкәчин үүл даав. Ааван дураһад зөв йос харлһна органмудт көдлхәр сана зүүдг билә. Ода эврәннь көдлмшт энүнә дамшлт олзлна. Әмтнә зөвинь харсхин күцлин тускар сәәнәр меднә.

Энүнлә хамдан көдлдг улсин тоолврар, Басн Александрович һардач болж цөөкн сар көдлжәх болв чигн энүнә дамшлт ил үзгднә. Дангин мет нөкд болж, сүв-селвгәрн хувалцна.

Энүнә әнгд сән медрлтә мөшкәчнр көдлнә. Баһ наста улст эдн үлгүр болна. Олдж авсн герчлһ яһж шинжлж хәләхнь эдн дасхна.

Дурта кергт цаг үлдхш гиж Бадмаев келнә. Сул цаг һархла эврәннь авальтаһан болн күүкд-көвүдтәһән цаган давулхар арһ хәәнә. Тегәд чигн мөшкәч эврәннь көдлмшин кемән болн цаган зуралж авх зөвтә.

Ээнән Дельгр, Котина Валерий