Элстд танһчин поэзин фестиваль төгсв

Элст балһснд танһчин поэзин фестиваль төгсв. Хойр сарин туршарт бичкн билгтнр Көглтин Даван бичсн үүдәврмүд меддгән үзүлв.

Үстин района Эрдниевский селәнә школын сурһульч Боован Пүрвә түрүн болж тиим ик чинртә келмчнрин маарһанд орлцжана. Эврәннь райондан диилвр бәрәд, Элст балһснд болх товчлгч десвнгд орлцх зөв авв. Көглтин Даван цуг үүдәврмүдәс хальмг келәр бичсн шүлгиг шүүж авв.

Пүрвә Боваевин келсәр, эн шүлгиг шүүж авснь чинртә, юнгад гихлә зуг хальмг келәр күцц кевәр эврәннь ухан-тоолвран медүлж болжана.

Танһчин поэзин фестиваль түрүн болж Элст балһсна болн райодын школмудын, дунд болн ик сурһулин заведеньсин оютнрин дунд болв. Орлцачнр хойр насни багд хувагдв. Эннь 14-18 наста көвүд-күүкд болн 18-22 нас күрсн баһчуд. Билгтнр 4 номинацар марһлдв: келмрчнр, баһ наста бичәчнр, зурачнр болн электрон презентац үзүлһн.

Хальмгин ик сурһулин номин дегтрин сангин һардач Надежда Какшаеван келсәр, жюрин гешүдт көвүд-күүкдин билгиг нохд күнд болв. Юнгад гихлә эдн цугтан сән, тохнята белдвр кесмн. Орлцачнрт эн маарһан икәр таасгдв гиж келх кергтә.

Көвүд-күүкд хальмгин олн-әмтнә бичәчин үүдәврмүдин чеежән өгәд умшж өгв. Заалд суусн улс чикнә хужһан ханһаһад, цаган сергмжтәһәр давулв. Келхд, Көглтин Дава баһ наста бичәчнриг дангин дөннгдг билә.

Фестивалин дииләчнриг апрель сарин чилгчәр ачлгдх.

Дмитрин Татьяна, Жамбин Дмитрий