Эндр инвалидмудын нарта-делкән өдр
Эндр инвалидмудын нарта-делкән өдр. Эн өдр нөкд болн дөн күләжәх улсин төрмүдт санаһан зовжах улсиг негдүлжәнә. Эн өдрмүдт сойлын болн спортивн керг-үүлдврмүд болжана. Хальмгин университетд мы такие как все, только сильнее нертә танһчин керг-үүлдвр болв. Энүнә һол күцлнь — инвалид улс дунд физическ культур болн спорт тархалһна төлә бүрдәж давулгдв. Энүнд Элст балһсна болн танһчин цуг райодын элчнр ирж орлцв.
Инвалид улс дунд болсн марһанд зун тәвн күн орлцв. Иим дөрлдән сән зангшалд тохрв. Арвн дөрвн наснас ах улс олн-зүсн марһаст орлцад, дииләчән йилһв, тер тоод пауэрлифтингин, мини-футбольн, настольн теннисн, дартсин болн армспортар дөрлдв. Келхд, настольн теннисн танһчин марһана ашар дииләчнрт спортивн разрядмуд зүүлһгдв.
Хальмгин спортын, туризмин, баһчудын политикин министр Александр Гедерим келсәр, эндр өдрт Хальмгт нег минһн долан зун инвалид күн спотрар болн физическ культурар соньмсжана. Д”оступная среда” программар спортивн учрежденьст эднә төлә цуг таал бүрдәгджәнә. Тер мет Әрәсән спортын министерствла хамдан шишлнг школ секх зура бәәнә.
Өдгә цагт паралимпийск жисән мана танһчд бас делгрлт авчана. Хальмг танһчин элчнр региональн болн цугәрәсән марһаст шунмһа кевәр орлцжана. Мы такие как все, только сильнее нертә жил болһн керг-үүлдврин ашар Хальмг танһчин паралимпийск хамцу команд тогтагдх.
Хальмг танһчар Әрәсән паралимпийск комитетин региональн әнгин ахалчин дарук Елена Горяеван келсәр, эдн иргч жилд Өмн үзгин федеарльн округин марһанд орлцх, тер мет цугәрәсән дөрлдәнд чигн орлцх зура бәәнә. Жил ирәвс көвүд-күүкд дамшлт авчана. Эндр зүткәтә марһан болх, цугтан диилвр бәрх саната.
Иим олн улс орлцата спортивн керг-үүлдврмүд инвалид улсин төрмүдт государственн органмуд болн олан элчнр оньган тусхахин төлә бүрдәж давулгдна. Жил болһн давулгддг керг-үүлдврин һол күцлнь — эрүл-дорул бәәлһнә авьяс тархалһна, инвалид бичкдүдиг спортар соньмсулһна төр халһгджана. Марһанд орлцачнр цуг арһ-чидлән агсж дөрлдв. Дииләчнр болн призермуд күндлһнә һашгудар болн белгүдәр ачлгдв.
Марһана диилчә Александр Мотина келсәр, цугтан спортар көдлхинь дурджана. Спорт күүнә занг батрулна, эврәннь өөрхн улсан харсж чадх. Спортын халхар сән күцәмж бәртн.
Марһана дииләч Арнзл Болдыревин келсәр, иргч жилсә авн сар болһн спорт болһнар салу марһа бүрдәх санан бәәнә. Тиигхлә спортивн разряд өгч болх. Инвалид улс ик марһанд, тер тоод цуәрәсән марһаст орлцх чадх.
Онц темдглхд, Сочи балһснд болх үвлин олимпийск нааднд Хальмг танһчин паралимпийск делегац бас орлцх. Нарта-делкән марһаг күсдундур минһн инвалидмуд хәләж чадх. Тер мет сочинск наад хәләхин төлә танһчин спортын министерствд билетмуд ирв.
Бевина Мергн, Хавтхна Анатолий
