Троицкое селәнд шин тагт тосхгджана

Хуучн тагтын ормд шин тосхгдх. Иим тосхлт Троицкое селәнә ар үзгт Булһн һолын көвәд күцәгджәнә. Хуучн тагт эвдрәд, энүгәр йовхд әәмшгтә болв. Иим тосхлт шишлнг программд орснас иштә кегджәнә. Декабрь сард шин такт селәнә улсиг байрлулх.

Троицкое селәнә ар үзгт Булһн һолын өөр бетон сооруженя тосхлт эклв. Энд бәәсн модн тактар бәәрн улс кесг жилдән һол һатлдг бәәж. Ода тагт хуучрад эвдрв. Энүнәс көлтә әмтнд йовхд күнд болв. Нег үлү хаврин цагт оруһин усн орж ирхлә, һатлдг арһ уга болж одна. Нег минһн күн бәәдг района әмтн һол һатлж чадхш.

Дәкәд болхла маши залж йовх улст бас түрү болна. Цасн-бальчгта цагт уутьхн хаалһар йовхд жанһрта болна. Иим хаалһар йовхд әәмшгтә.

Эн жолачин келсәр, иим зовлнгтаһар оньдин йовх кергтә болна. Оруһин усн ирнс цагт хаалһар йовж болхш. Арлд бәәснлә әдл болна. Ода байрта бәәнә. һардачнр ханлт өргжәнә. Эн күүкд күүнә келсәр, такт кехнь күлжәсн угавидн. Күләдгән уурвидн. Ода сән болх.

Бәәрн әмтн кесг дәкж селәнә һардачнрт энүнә тускар келсн билә. Зуг эдн эн төриг хаһлсн уга. Зун давсн жиләс авн эн керг дор ормасн көндрв. Троицкое СМО-н администрацин толһачин дарук Санж Антоновин келсәр, Хальмг танһчин усна эдл-ахун комплексин делгрлтин туск программ батлж авсна хөөн эн төсвиг харсж чадв. Эн тосхлтын төлә зурһан сай асрлнг дөнцл мөнгн йилһж өггдв.

Санж Антоновин келсәр, өргндән эн гидросооружень арвн метрт күрх. Машид йовдг хаалһ долан метр. Иргчдән йовһн улс йовдг хаалһ бас кегдх. Энүнә тускар Троцикое СМО зуралв.

Тосхлтын көдлмшиг энд эн жилин октябрь сард эклв. Энүнә төлә селәнә муниципалитетла бооцан батлж авгдв. Такт тосхлһна көдлмшин кемжәнь ик. Төмр конструкц кехин өмн һолын йорал цеврлх кергтә, көвәһинь батрулх төр тәвгджәнә.

Тосхлтын организацин генеральн директор Бадма Петровин келсәр, ода еедрән көвә батрулх цуг көдлмш кегдв. Бетон көдлмш кехин төлә белдвр кегджәнә. Ода арвн һурвн турва күләжәнә. Энүн углж тәвхлә машид йовдг хаалһ кегдх.

Ода деерән көдлмш темдглсн зураһар кегджәнә. Энүнд цуг тосхлтын көдлмш декабрин чилгчәр төгсх зөвтә.

Чучян Валентина, Бадмаран Владислав