Эндр экин сүн өдр. Экнр эврәннь үрдүдән өскж, сән сурһмж өгәд, жирһлин чик хаалһд орулхар эдн шунна
Экнр эврәннь үрдүдән өскж, сән сурһмж өгәд, жирһлин чик хаалһд орулхар шунна. Тегәд чигн шангин халхас экнрт сән дөн кергтә болжана. Жил болһн экин мөнгнә кемжән өсәд йовна, баһ тетквртә өрк-бүлмүдиг дөннлһнә закан батлж авгджана. Эн жиләс авн мана танһчд тавнас үлү бичкдүд өскжәх өрк-бүлмүдт һазрин хойр участк йилһж өггджәнә. Зәрм әмтн иим зөвән олзлж чадв. Мана зәнгч Ээнән Ольга энүнд ил герч болв.
Мана өрк-бүл ик болн ни-негн гиж Татьяна инәмсклж келнә. Тавн үрн болн би авальтаһан долан күн болжанавидн. Иим олн үртә өрк-бүлд герин көдлмшиг яһж кедгнь бас сонбн болна. Нег үлү, ода эдн нилхтә болв. Татьянан келсәр, герин көдлмшиг эдн амрар күцәнә. Күүкднь экдән ик нөкд болжана. Эдн хот-хол кехд дөн күргнә, талдан чигн даалһвр күцәнә. Эднә ууһн Намжл күүкн ода арвн хойр наста. Намжл эврән хот кедг дасж авла, хувц хунр чигн уйж чадна. СНХ Татьяна Онкорован келсәр, Намжл цуг көдлмш кеж чадна. Сурһулян сәәнәр сурна. Дүүһән чигн хәләнә, хувц уһадг дасв гиж экнь келнә.
Эврән бийнь Татьяна ик өрк-бүлд өсж босв. Бичкн цагасн авн нег-негндән нөкд болад, цаһан седклтәһәр бәәдг дасв. Селән һазрт цуг көдлмш кеж дасх кергтә. Эс гиж селән һазрт бәәхд күнд болх. Онкоровихн эврәннь герән көлсәрн олсн мөнгәрн тосхж авсмн. Александр Онкоров олн үр өскх сана зүүһәд, ик гер бәрж авх күцл тәвж. Ода сансн санан күцж йовна гиж Александр келнә. Түрүн авгтан ахдан нөкд болад, хөөч болж көдлв. Мал өсклһнә халхар сән дамшлт хоршав. цөн жил болад, крестьянск-фермерск эдл-аху бүрдәж чадв. Тиигхд көдлмш урлан йовдг болв, герән экләд тосхв. Ода Александр эврәннь өрк-бүлин тускар төвкнүн санамр бәәнә. СНХ Алексанлр Онкоровин келсәр, фермерск эдл-аух Яшкуляс һучн дуунад бәәнә. Тегәд генртә хая-хая ирх арһ учрна. Гетән ирхләрн чееж сергнә гиж Александр келнә.
Өрк-бүл бат болхла, ямаран чигн түрү бәәдләс һарч болна. Александр Онкоровин тоолврар, күн болһнд күнд бәәдл учрна. Отхн Аюка көвүн төрсн цагт эдн икәр үүмәд бәәв. Көвүн болзгас невчк эрт төрәд, әәмшг учрав. Ода Онкоровихн эмчнрт ик ханлтан өргжәнә. СНХ Татьяна Онкорован келсәр, танһчин бичкдүдин больницин эмчнрт болн сестраст ик ханлтан өргжәнәв. Нег сардан больницд эмнүлвидн. Ода көвүн эрү-менд гиж экнь байрлж келв.
Района социальн церглт олн үртә өрк-бүлд дөн түшг болжана. Эднд өггдг дөнцл мөнгн цаглань ирнә. Тер мет тавн үртә болад, Онкоровихн хойр һазрин участк авсмн. Эн һазрт отхн Аюка көвүндән шин гер бәрх саната.
