Эндр Әрәсән прокуратурин көдләчнрин сән өдр
Прокуратурин ветеранмуд дунд Илья Аксеновин нер онц темдглж болх. Танһчин прокурорск церглтд һучн шаху жил көдлв. Ода күртл дамшлтта специалист баһ наста прокуратурин көдләчнр болн танһчин талдан чигн улст арһ-чидләрн дөн болжана. Ода Илья Аксенов ачта амрлһнд бәәнә. Тер бийнь хальмгин ветеранмудын Хүүв һардж көдлжәнә.
Прокуратурин көдләчнр эврәннь ик даавран хойр зун йирн жилдән сәәнәр күцәжәнә. Эднә элчнрин келсәр, закан болн диг-даран хамгин ик чинр зүүх зөвтә. Хальмг танһчин прокуратур нег минһн хойр зун хөрн хойрдгч жилд бүрдәгдсмн. Тер цагт энд зуг нәәмн күн көдлжәлә. Танһчин түрүн прокурор болж , алзн Манкиров көдлсмн. Тер цагт иим ик цол даахд амр болсн уга. Хальмг танһчин прокурорин нөкд Галина Харашкина келсәр, тер цагт закан һарад уга бәәсмн. Тиигхд Президиумин зәрлгәр көдлдг бәәж. Иим зәрлг тер кемд бас баһ билә. Зуг уголовн болн процессуальн кодекс бәәсмн. Административн закан тер цагт һарда уга бәәж. Зуг президиумин зәрлгүд үүлддг билә.
Прокурорин церглтин ветеран Илья Аксенов иим ик дааврта көдлмшин тускар йир сәәнәр меднә. Эн дамшлтта специалист кесг баһ наста көдләчнрт дөн болсмн. лайф эн аппаратыг таньжанав. фотоувеличитель билә. Иим аппарат мини кабинетд билә гиж Аксенов келнә.
Тер цагт Городовиковск района прокурор болж көдлжәсн Бутур Барикаев нег минһн йисн зун далн һурвдгч жилд шунмһа болн школын комсорг болж көдлжәсн Илья Аксеновиг дуудад, Ик-Буурла района прокуратурт одад, дамшлт хоршах даалһвр өгв. Энүнә хөөн Илья Аксенов Кубанск государственн университетд сурв, района прокурорин нөкд болж көдлв. Хальмг АССР-ин прокуратурин мөшкәч болж үүлдв, Яшалтинск района прокурорт шиидгдв, хөөннь Целинн районд көдлв. Амрлһн һархин өмн Илья Чидеевич хальмг танһчин прокурорин нөкд болж көдлсмн. Пенсьт һарх эрлһ орулж өгхләрн, эврәннь көвүн Баснг прокуратурин церглт орх эрлһнлә хамдан бичсмн.
Ода көвүнь Көтчнрә района прокурин дарук болж көдлжәнә. Илья Аксенов болхла, “За трудовую доблесть” медаляр ачлгдв, Әрәсән Федерацин ачта юристын нер зүүв, негдгч девснгин за верность закону темдг зүүлһгдв, юридическ номин кандидатын цолта. Хальмг танһчин прокуратурин ветеранмудын хүүвин ахлач Илья Аксеновин келсәр, ода государственн органмуд дунд прокуратур хөв харслһна һол үүлдвр күцәжәнә. Зарһин систем тас талдан. Государственн органмуд дундас зун прокуратур ор һанцхн хөв харслһна систем болжана.
Өдгә цагт Илья Аксенов баһ наста прокуратурин көдләчнрлә дамшлтарн хувалцжана. Хөрн нәәмн жилдән хоршасн дамшлт баһчудт сән нилчән бас күргжәнә. Тер мет танһчин талдан чигн әмтн энүнәс сүв-селвг сурна. Ода деерән арһ чидләрн олн улст дөн болж чадхв гиж прокурорск церглтин ветеран Илья Аксенов келнә.
Хавтхна Элла, Ирчин Алексей
