Эндр Әрәсән нертә номт Г. Волковин санлд нерәдгдсн конференц көдлмшән эклжәнә
Эндр Элст балһснд Әрәсән нертә номт, академик, профессор болн педагогическ номин доктор Геннадий Волковин санлд нерәдгдсн номин дамшлтын конференц көдлмшән эклжәнә. Тоомсрта номт Геннадий Волков келн-улсин эрдм-сурһулин халхар нәәмн зун номин, художественн педагогическ үүдәвр болн статьяс бичсмн. Арвн жилдән Геннадий Никандрович Хальмгин университетин номин хүүвин гешүн болж көдлсмн. мана танһчин деед сурһулин этнопедагогическ иннвацин номин шинжлтын лабораторин һардач болж үүлдв. Волковин найн тавн жилин өөнд нерәдгдсн санлын ик хургин көдлмшт Хальмг танһчин, Казахстана, Тыван, Чувашин, Дагестана, Якутин, Бурятин, Марий Эл республикин, Ставропольск крайин, Москван, Воронежин болн Волгоградын номин болн педагогическ олна элчнр орлцжана. Эндр Якутин, Тыван элчнр Пальмовин нертә келн-улсин музейд одв. Гиичнр Хальмг танһчин сойлла болн йиртмжла өөрхн таньлдв. Геннадий Волковин сурһульчнрин келсәр, иим конференц нертә номтын санл мөнкрүлсн деерән, энүнә кергиг цаарандан делгрүлж, этнопедагогикд шин зөрүлт батлж авлһн сән нилчән күргх.
