Насни дигт күрәд уга бичкдүдт әрк хулдсн әмтн чанһ засгла харһулгдх

Насни дигт күрәд уга бичкдүдт әрк-чаһр хулддг улсин ялын кемжә икдүлһнә тускар Госдумин депутатнр ирлцнһү закаг һурвдгч умшлһнд кев. Шин закаһар иим ял арвн холванд өсв. Үлгүрнь, иим зака эвдсн юридическ әмтн өрәл сай арслнг ял өгх.

Баһчудын тоолврар, өдгә цагт хотл балһсна магазидт әрк-чаһр хулдж авхд амр. Ик ору авхар арһлачнр насни дигт күрәд уга бичкдүдт әрк-чаһр хулдшго зака эвдәд, өдр-сө уга гилтә иим продукц хулдна. Иим арһлачнриг засгла харһулхин төләд олн-зүсн ведомствин көдләчнр оньдин рейдмуд күцәнә. Элст балһснд Әрәсән МВД-н заллтин әнгин ахлачин үүл дав зуур даажах, полцин майор Валерий Сухуровин келсәр, эн жилин эклцәс авн насни дигт күрәд уга бичкдүдт әрк хулдсн иим арһлачнрин тускар йисн протокол бичгдв. Магазидт көдлжәх хулдачнрин болн арһлачнрин тускар төр босхад, иим кевәр зака эвсдн улсин хулд кедг зөвшәлин авх кергтә.

Баһчуд дунд әрк чаһр тархалһиг баһрулхин төлә ялын кемжәг икдүлжәнә. Әрк ямаран хорлтан күргдин тускар ода цугтан келнә. Зуг өдгә цагин баһчуд энүнә тускар ухаллго, пиив —әрк уужана. Хальмг танючин эрүл-менд харлһна министрин үүл даажах Владимир Шовуновин келсәр, баһ наснас авн әрк уухла, цогц-махмуд му болна, эрүл-менд эвдрәд, гем ирнә. Ода баһчуд пиив ууна. Иим продукц эднә иргч жирһлд му нилчән хальдах.

Урднь иим халхар авдг ялын кемжән дегд бичкн бәәж. Үлгүрнь, насни дигт күрәд уга бичкдүдт әрк-чһар хулдсн улс зуг тавн минһн арслнг ял өгдг бәәж. Шин закаһар иим ял зөвәр ик болх. Ода әрк-чаһр бичкдүдт хулдсн физическ әмтн тәвн минһн арслнг ялд унх. Үүл даажах улс болхла, хойр зун минһн арслнг ял өгх зөвтә. Юридическ әмтн өрәл сай арслнг ялд унхмн. Элст балһсна мэрийн әнгин ахлач Татьяна Утинская келсәр, дару-дарунь иим рейд кехлә, хулдачнр саг бәәнә. Әрк чаһр хулддг арһлачнрла цәәлһврин көдлмш кегднә.

Күчәр әәлһәд әркд бичкдүдиг орулсн улс болхла шин закаһар түүрмд суухмн. Насни дигт күрәд уга бичкдүдин әрк уусн эк-эцкнр хойр минһн арслнг ял өгх зөвтә.

Гольдина Ирина, Очра Сергей