Эн өдрмүдт Ленинградыг бүслврәс сулдхсна жирн йисдгч өөн күцв
Төрскән харсгч дәәнә тускар Элст балһсна медәт Александр Александров ода күртл сәәнәр тодлна. Мана орн-нутгин хамгин һашута туужин нег халх — Ленинград балһсыг бүслврт авсн цагт зурһан настадан тенд күзүцә зовлнг дааһад һарв. Эн өдрмүдт ар үзгин хотл балһсыг бүслврәс сулдхсна жирн йисдгч өөн күцв. Олн сай улс бәәсн балһсн йисн зун өдртән бүслврт бәәсмн. Тенд иим ик зовлнг үзсн медәтлә мана үүдәгч баг харһад күүндв.
Дән эклсн цагт бичкн Саша Александров зуг тавн наста бәәж. Ленинградт төрсн көвүн тер һашута цагиг бас тодлна. Дегд киитн болад, экнь көвүһән, кегс давхр хувцар дулалдг бәәж. Сөөднь болхла Сашад оньдин нег зүүдн ордг билә. Медәт Александр Александровин тодлсар, оньдин хот уух дурн күрдг билә. Тер цагин тодлхд йир күнд. Оньдин ик корзинд пирожки бәәхнь зүүднд ордг билә. Экнь серүлхлә, серх дурн уга бәәсмн. Икәр уульдг бәәж.
Бүслврт бәәсн балһсна әмтн харһнад арһ уга столярн крахмал һалд халулад иддг бәәж. Тавн наста көвүн догшн киит болн өлсх цаг дааһад әмд үлдж. Эндр өдр күртл медтә тер цагиг тодлхла, нүднә нульмсан әрә гиж бәрж чадна. Александр Александровин келсәр, наадһа шатасинь тодлна. Нег дәкж хам-хоша бәәх күүкд күн эктн өнгрж одла гиж келв. Экән бүркәтә кевтхинь үзләв. Хөөннь бичкдүдин герт йовулж.
Ленинград балһсн дәәнә цагт йисн зун өдр бүслврт бәәв. сүркә киит болн өлслт даалго әмнәсн хаһцсн нег сай үлү әмтн Пискаревск үкәрт оршагдсмн. Болв балһсна кедү әмтн өнгрсн тускар ода күртл күцц то уга. Туужин номтнрин тоолврар, нег минһн йисн зун дөчн негдгч жилин сентябрь сард Ленинград балһснд олн сай әмтн бәәршлжәсмн. Нег үлү, энд дәәнә һалас зуслн әмтн бас бәәв. Бүслвр эклсн цагт Нева һолд бәәх балһснд хот-хол болн тосн-ьүлән икәр белдж авгдж уга. Туужин номин доктор Уташ Очировин келсәр, Ленина балһсыг эрк биш немшнрт өгшго даалһвр Советск Союзин һардвр өгсмн. Гитлер бас эн балһсыг эрк биш эзлхәр седсмн. Эн балһс эзләд авх күцл немшнрт тер цагт һол күцл бәәсмн.
Зуг дөчн дөрвдгч жилин январин арвн дөрвнд Лениград балһсыг бүслврәс күцц сулдхсмн. Александр Иванович Александров болхла хальмг танһчд ирж бәәршлв. энд һучн жилдән электроһаннач болж көдлв. Тер цагас авн көгшә эврәнь төрсн болн күзүцә зовлнг үзәд һарсн балһснд нег чигн дәкж одж чадсн уга.
Татьяна Дмитриева, Бадмаран Владислав
