Эн өдрмүдт зогсчах зөвәр киитн өдрмүд комунальн церглтин көдләчнрин өмн шүүвр тәвжәнә
Эн жил мана танһчд намр зөвәр уданд татгдад, цаг дулан-сәәхн болв гиж келх кергтә. Болв өдгә цагт үвл медлдән орсн бәәнә. Эн өдрмүдт зогсчах зөвәр киитн өдрмүд комунальн церглтин көдләчнрин өмн шүүвр тәвжәнә.
Эн өдрмүдт зогсчах тенгрин киитн бәәдләс иштә һаза дала улс уга. Кергәрн һаза һарсн әмтн дулан гертән күрхәр адһцхана. Болв цуг гермүдт дулан гиж келж болшго. Бидн эврә гертән бәәнәвидн, ик дулан гиж келж болшго , хорас дегәд ик болжах кевтә гиж эн күүкд күн келнә.Киитн өдрмүдт гертән дула орулдг тоот олзлнавидн гиж зәрм улс ухан-тоолврарн хувалцна.
Надежда Котован герт эндр урдк өдрмүдлә дүнгцүлхлә дулан болжана. Болв зәрмдән дегәд киитн болна. Тер цагт көк түлә орулдг системан олзлад, дуладнав гиж эн күүкд күн келнә. Герт киитн болдг учрар мини ач күүкн ирхәр седхш гиж Надежда Котова цааранднь күүндврән давулв.
Жил болһн эн күүкд күн дула оруллһна системин туск төр босхдг болжана. Хот уудг болн телевизор хәләдг хорад дангин киитн болна, наадк хорас дулан болж һарна. Тегәд китн хораст дула орулхин кергт бәәцин-коммунальн эдл-ахун көдләчнр дару-дарунь ирж турва цеврлнә. Болв учрнь юундв гисн сурврт эн специалистнр долан жил дарандан хәрү өгч чаджахш. Котовала нег герт бәх зәрм әмтн бас иим йодвлла харһна. Эн төрәр мана үүдәгч баг заллтын компаняс хәрү авч чадсн уга. Бәәцин-коммунальн эдл-ахун министерствин зәнглсәр дула оруллһна цаг эклснәс авн нег чигн аварь темдглгдсмн биш. Тегәд коммунальн эдл-аәхун көдләчнр дула оруллһна цагт цагларн бел кеһәд үүлдждәнә гиж эн ведомствин министрин дарук Сергей Точка темдглв. Район болһнд диспетчерск церглт үүлджәнә, һурвн зун тонн угль болн зун йирн дөрвн тонн мазут белдгдсн бәәнә гиж Сергей Точка цааранднь цәәлһж келв.
Болв дула орулдг системд бәәж-бәәжәһәд эвдрлт һарна. Энүнд заллһна компаня гемм бәәнә гиж министерствд тоолжана.
Синоптикүдин зәнглсәр, сиврин циклон сольгдсна ашт салькна күчн икдхмн. Тегәд шүүрһн шуурх әәмшг бәәнә. Тегәд коммунальн халхинкөдләчнрин шүүвр ода бийнь өмн гиж келхкергштә.
Дмитрин Татьяна, Очра Сергей, Хулхачин Николай
