Элстин лицейд нанотехнологин эв-арһ олзлжана
Элстин лицейд эндр нанонеделя керг-үүлдврин аш диглх. Эн сурһулин заведень мана танһчд нанатехнологин эв-арһд нерәдгдсн цугәрәсән керг-үүлдврт орцлжах ор һанцхн учреждень болжана.
Химин, физикин болн биологин предметмудар кичәлмүд болдг лабораторь Элстин лицейин йоста бахмж болжана. Энд бәәх иим оборудовань дәкж талдан нег чигн танһчин сурһулин заведеньд уга. Иим өдгә цагин некврлә ирлцәтә аппаратмудын дөнгәр сурһульчнр нанотехнологин эв-арһ олзлж чаджана. Ах классмудын көвүд-күүкд наноэдьюкатор нертә сурулин комплексин эв-арһин үзүлжәнә. Эн көвүнә келсәр, иим дискин тасрхад нүдәрн юм үзж болшго. Микроскопын дөнгәр цугнь үзгднә. Энүнә ашнь компьютерт һарч ирнә.
Сурһульчнрин келсәр, иргчдән зондин микроскопын болн компьюетрин дөнгәр эдн компакт-дискд микроскопическ бичвр кеж чадх. Эднә багшнр иргчин тускар ухалад, сурһульчнр иим эв-арһ олзлсн деерән, шинжлтын кех гиж нәәлжәнә. Иим кевәр баһчуд номин халхар түрүн ишкдл кеж чаджана.
Физикин багш Марина Горбаневан келсәр, ардвгч класст сурһульчнрт нанофизикин, нанохимин предметмудар сурһуль болна. Арвн негдгч класст көвүд-күүкд нанооборудованяр көдлдг дамшлт хоршана.
Физико-эсвин халхин арвн негдгч классин сурһуль Цецн Дорджинов эрк биш техническ деед сурһульд орх саната. Иргчдән промышленностин халхар өдгәц агин номин эв-арһ олзлж көдлх зурата. Энүнә келсәр, йисдгч класс күртл энүнә тускар алмацжасмн. Цецн Доржиновин келсәр, лицейин сурһулин зурад нанофизик орулна хөөн иим шүүвр кев. Энүнә келсәр, давсн жилд Москва балһснд наноград школд зунын кемд сурч чадв. Эн керг-үүлдврин йовудт Инжинирнг нертә мастерскойин көдлмшт орлцв. Тер мет Микроп корпорацд дамшлтан өөдлүлв.
Физикин багш Марина Горбаневан келсәр, эн көвүн лицейдан иим обоурдованяр көдлдг дасв, Москва балһснд одад бас иим оборудованяр көдлв.
Лицейин директор Татьяна Питкееван келсәр, цуг эн тоот нанолабораторь, инновацинн предметн сурһуль, марһаст болн һәәхүлмүдт көвүд-күүкд орлцлһн бас учрта. Хойр минһн арвн хойрдгч жилд марһана шүүврин ашт Элстин лицей Әрәсән эрдм-сурһулин хамгин сән гисн зун учрежденьсин тоод орад, Школьная лига РОСНАНО программд орсмн.
Лицейин директор Татьяна Питкееван келсәр, иим программд орлцһлн сурһульчнрт олн-зүсн марһаст орлцх арһ өгнә. Иим марһана ашар эдн зунын кемд талдан регионд олн-зүсн сурһульд орлцх арһ шгнә. Лицеин көвүд-күүкд хойр дәкж иим наноградт одад дамшлтан өөдлүлв. Хойрдвар болхла эднә багшнр бас өнгәр олн-зүсн сурһульд орлцж чаджана. Һурвдвар, лицеин директор бас эн халхар медрл авад, дамшлт хоршах арһ иим программ өгчәнә.
Дәкәд болхла Элстин лицей хойр жилдән Школьный этап нано и технопредпринимательства нертә цугәрәсән керг-үүлдврт орлцжана. Энүнә йовудт болдг номтнр орлцата төгрг ширән сүүр, экскурсь сурһульчнрт гүн медрл авлһнд дөн болжана. Иим һәәхүлмүдин, наадна болн марһана йовудт сурһульчнр нанотехнологин халхар шингәсн медрлән үзүлхд сән нилчән күргнә. ВЗК: Нанонеделя нертә керг-үүлдврт орлцсн лицеин көвдү-күүд энүнә тускар иим ухан-тоолврта бәәнә.
Сурһульч Алдр Баранговин келсәр, сурһульчнрт иим сурһуль йир соньн. Талдан школмудт иим оборудовань уга. Кичәлмүдт эврә һаран олн-зүсн дамшлт кеж болна, эннь гүн медрл авхд туслна.
Нанонеделя керг-үүлдврин ашиг лицейд эндр диглх.
Чучян Валентина, Эрнжәнә Эрднь
