Элстд шин нефрологическ цутхлнг секгдв
Эндр Элст балһснд Ар Кавказин нефрологическ цутхлнгин филиал байрин бәәдлд секгдв. Энүнд Хальмг танһчин толһач Алексей Орлов орлцв. Шин цутхлнгд һурвн залд өдгәц агин некврлә ирлцәтә оборудовань углж тәвгдв. Бөөрин гемтә улст энд цуг кергтә эмнүлин таал бүрдәгдв. Ода мана танһчд иим найн гемтә күн бәәнә.
Наталья Огиева шин цутхлнгд секхинь өмн ирв. Ик оньган өгч у-сарул хорас хәләв. Гемтә әмтн шин цутхлнг секхиг тенкән уга гидгәр күләжәнә. Энүнә өмн урднь гемодиализин туслмж зуг танһчин больницд күргдг бәәсмн. Хорас баһ болад иим бәәдл тогтв. Эмчнрин келсәр, һурвн селгәнд кергтә болв. Шин цутхлнгд болхла арвн тавн шин аппарат углж тәвгдв. Тер мет энд амрлһна хора бәәнә, бийән уһадг хора бас кегдв. Дәкәд болхла гемтә улс халун хотар теткгдх.
Наталья Огиеван келсәр, шин цутхлнгд сарул сәәхн. Хуучн әнглә дүнцүлхлә, тас талдан бәәдл тогтв. Энд шин оборудовань бәәнә.
Клавдия Егоровна әрә гиж көндрәд эврән йовна. Иим улсиг шишлнг машин эмнүлһнд авч ирх. Тегәд шин цутхлнг секгдх зәнг энүг икәр байрлулв. Урднь эмнүлһ авхин төлә күүкд күн танһчин больницд такси авдг билә эс гиж элгн-садан сурдг бәәж. Искусственн бөөр нертә аппарат арвн жилдән олзлжана. Клавдия Виткалован келсәр, ик удан гемтжәнә. Түрүн орхдан йир күнд бәәж. Ода иим аппаратын нилчәр әмд бәәнә.
Шин цутхлнг түрүн региональн инвестиционн төсв болжана. Эн цутхлнг эзнә государственн партнерствин делгрлтин программар секгдв. Ар Кавказин нефрологическ цутхлнгин болн Хальмг танючин правительствинг хоорнд батлж авсн зөвшәлтәр шин цутхлнг нег жилин эргцд тосхгдв. Энүнә төлә найн сай арлснг йилһж өггдв. Цутхлнгин аһу һурвн минһ дөрвлжн метр тогтажана. Һурвн залд өдгәц агин некврлә ирлцәтә оборудовань углж тәвгдв. Энүнә һарджач Надежда Илишкина келсәр, зәрм оборудованя нилчәр цус цеврлж болхмн. Бөөрин гемтә улст иим оборудовань сән нилчән күргнә. лайф Цутхлнгин һардач Надежда Илишкина келсәр, энүнә өмн иим шин оборудовань уга бәәсмн. Нег үлү шин аппаратмуд немр туслмж күргж чадна. Эмнүлһн сән чинртә болжана. Эннь гемтә улст таасгджана.
Тер мет хальдврта гепатит гемтә улсиг шишлнг салу хорад эмнүлх арһ бәәнә. Танһчин эрүл-менд харлһна болн социальн делгрлтин министр Владимир Шовуновин келсәр, урднь гемодиализин туслмж авдг танһчин гемтә улс Ростовин, Әәдрхнә болн Волгоградын больницд оддг бәәсмн. Зуг йирдгч жилмүдт танһчин больницин реанимационн әнгд искусственн бөөр нертә түрүн хойр аппарат хулдж авгдла. Эдниг Шовунов эврән Москван Склифосовскийн нертә номин шинжлтын институтас авч ирсмн. Эндр шин цутхлнг секлһнә байрт эрүл-менд харлһна министр орлцснь бас темдгтә йовдл болв.
Эрүл-менд харлһна министр Владимир Шовуновин келсәр, мана танһчд диализн әнг секгдәд дигтә хөрн жил болв. Ода болхла мана танһчла хам-хоша бәәх регионмудын әмтн ирж эмнүлһ авчана. Иим нег туслмж тавн минһн арслнг күрнә. Давсн жилд нәәмн минһн күүнд туслжм күрггдв. Энүнә төлә танһчин бюджетас дөчн тавн сай арслнг һарв. Эннь ик мөнгн болжана.
Иим гемәр гемтсн улсин то жил ирвәс өсәд йовна. Хальмг танһчд жил болһн бөөрин гемтә улсин то арвн күүнд икднә. Тегәд шин нефрологическ цутхлнг эднд ик дөн болх.
Ээнән Ольга, Котина Валерий
