Элстин баһчуд гер-интернатын бичкдүдин төлә буйнч седклин керг-үүлдвр бүрдәв

Цаһан седкләсн кесн керг-үүлдвр оньдин сән ашта болна. Иим үгмүдин чинриг күн болһн сәәнәр медхш. Тегәд буйнч седклин керг-үүлдвр болһн бичкдүдт ик байр үүдәнә. Иигж Элст балһсна гер-интернатын көвүд-күүкд тоолжана. Энд бәәх далн тавн бичкдүдт кергтә килмж болн оньг талдан улс ирж тусхах зөвтә. Элст балһсна баһчудын организацин элчнр бүрдәж давулсн буйнч седклин керг-үүлдвр гер-интернатын бичкдүдт ик байр үүдәв.

Элст балһсна гер-интернатд ода далн тавн көвүн-күүкн бәәнә. Эднә дунд эврәннь көләрн йовж чаддго бичкдүд бәәнә. Дөрвн багин төлә сурһулин болн делгрлтин эврә программ үүлджәнә. лайф Элстин гер-интернатын директорин дарук Анжела Авееван келсәр, интернатд бәәх цуг бичкдүд насни баг-багар хувагдв. Энүнд хамгин бичкн көвүд-күүкдин баг бәәнә, энүнәс ах бичкдүдин баг үүлджәнә. Көүвд-күүкд хамдан өрүн йисн часас авн арвн хойр час күртл сурна.

Бичкдүдин интернатд өдгә цагин оборудовань углж тәвгдв, тер тоод релаксационн хора көдлжәнә, шин компьютермуд бәәнә, герт шин пластикин терз тәвгдв. Гер-интернат танһчин бюджетас мөнгәр теткгджәнә. Энүнд көдлжәх улс көвүд-күүкдин төлә кергтә таал бүрдәхәр зүткнә. Талдан иим учрежденьла әдл энд хаһлх төрмүд бәәнә.

Анжела Авееван келсәр, гер-интернат найн негдгч жиләс авн көдлжәнә. Тегәд энд зәрм коммуникац шинрүлх кергтә. Ода бичкдүдин төлә эврә автобус кергтә.

Америкин бичәч Марк Твена бичсәр, цаһан седклиг дүлә болн сохр күн чигн медж сонсж чадх. Элст балһсна баһчудын бүрдәж давулсн интернатын төлә буйнч седклин керг-үүлдвр иим үгмүдин ил герч болжана. Интернатын бичкдүд хотл балһсна цутхлнгд одв, православн чонж, Хальмгин хурл һәәхв, әмтәхн хот-хоолар тоогдв. Программин чилгчәр эднә төлә фейрверк тәвгдв.

Очр Ользятиевин келсәр, эн буйнч секдлин керг-үүлдвриг бичкдүдин төлә бүрдәж кежәнә. Эднд балһс үзүлв. Юнгад гихлә бичкдүд гертәс һархш.

Саглр Мучкаеван келсәр, мөнгн ховр болжах төр хәләлго, бичкдүдт килмж тусхаһад, оньг өгх кергтә. Эннь мөнгнәс үнтә белг болна.

Бүлән күр-күүндр кехлә, бичкдүд сергмж авад, седклнь байрар дүүрнә. Эднд килмж тусхаһад, оньг өгхлә, эднд энүнәс даву байр керг уга болжана.

Елена Алексенко, Хавтхна Анатолий