Антинаркотическ комиссин сүүр болв

Эндр танһчин толһач Алексей Орловин һардврта танһчин антинаркотическ комиссин дарани сүүр болв. Энүнд нәәмн төрәр күүндвр кегдв. Эн жилин зурһан сарин эргцд сокту улсиг илткж авлһна арвн һурвн минһн медицинск шинжлт кегдв. Эннь давсн жилин түрүн өрәллә дүнцүлхлә хөрн хойр процентд ик болж һарв. Эн жилин зурһан сарин эргцд зун жирн негн наркотикуд олзлсна йовдл илткгдв. Эннь давсн жиләс арвн процентд баһ болж һарчана. Региона толһач Алексей Орловин темдглсәр, давсн жилд болн эн жилин түрүн өрәлд эн халхар сән үзмж бәргдв, мана танһч күнд бәәдләс һарв. Эннь йосна цуг халхсин көдлмшин аш болжана. Иргч жилд шин наркодиспансерин герин тосхлт эклх. Энүнә төлә иргч жилин бюджетд хойр дундур сай арслнг йилһж өггдх даалһвр орулгдв. Элст балһсна администрац энүнә төлә һазрин участк йилһж өгв. Антинаркотическ комиссин гешүдин темдглсәр, баһчуд олар цуглрдг һазрт шишлнг рейдмуд кегдв.